كود بني ملال//

جهة بني ملال خنيفرة عايشة هاد الأيام موجة انسحابات كبيرة من شباب حركة GENZ212، اللي بداو كيهضرو على “انحراف المسار ديال الحراك”. هاد الحركة اللي كانت بدايتها كتدافع على مطالب اجتماعية واضحة بحال الصحة والتعليم، ولات اليوم بالنسبة للمنسحبين بعيدة على الهدف اللي خرجو من أجله.

شباب من بزاف ديال المدن بحال بني ملال، قصبة تادلة، الفقيه بن صالح، سوق السبت، خريبكة، أبي الجعد، وادي زم، أزيلال، دمنات، خنيفرة ومريرت، أعلنوا انسحابهم نهائياً من الحركة. وقالو أن أي دعوة مستقبلية للاحتجاج ما كتمثلهمش وما كتهمهمش، وأنهم بغىو يوضحو أنهم ما باقيينش تابعين للحراك.

المنسحبين عبرو على أن الحراك تحوّل من المطالب الاجتماعية لمواضيع “غامضة” كتهم المؤسسات، وأنه فقد البوصلة وما بقاش كيعكس طموح الشباب اللي باغي التغيير بطريقة سلمية وديمقراطية. البيان ديالهم شدد على أن الشباب خاصو يكون واعي وحذر من الدعوات مجهولة المصدر، ويشارك فالمسارات الديمقراطية الواقعية باش يتحقق التغيير اللي كيتسناوه.

متتبعين كيشوفو أن هاد الانسحابات ممكن تكون بداية لتراجع زخم الحركة، خصوصاً بعد ما فقدات جزء كبير من القاعدة الشبابية ديالها فجهات كثيرة فالمغرب. السؤال اليوم: واش GENZ212 غادي ترجع للمسار ديالها الأصلي، ولا هاد الانسحابات بداية النهاية؟