سهام البارودي ـ كود//
ماعنديش مع هادوك العيالات لي تاكايشبعو فلوس، عاد كاينوضو يقوليك “مابغيتش نكون سترونغ اندبندت وومن” ولا كاتلقاها عندها شي وظيفة قارّة ومدخول قار وحيت ضاربات مع شي زميلة فالخدمة ولا حيت رفضو يعطيوها أوگمونطاسيو هاد العام كاتقوليك “ماكرهتش غي نجلس فالدار ونلقى لي يصرف عليا” كايفونطازميو مساكن على واحد الواقع كاين غي فالمخيلة ديالهم، هي جالسة فالدار تيتي نيني ميمي والراجل كايصرف عليها، ولكن آطونسيون، هادو كاملين لي كايقولو هاد الهضرة راه ماكاتخايلش راسها ساكنة معاك فشي دار ديال الكرا فالشلالات ولا الرحمة ولا فرح السلاّم، تركب معاك فطاكسي كبير، وتقري ولادها فالعمومي وتخلي ليها خمسين درهم فالنهار تقدى بيها من الهري وضيباني الفطور والغدا والعشا، هادو كاملين تقوليها جاك واحد السيد خدام سيكيريتي ولا خضار ولا نجار ولا موظف كايربح واحد الخمسالاف درهم فالشهر تقوليك لا ولكن الصالير قليل… كيفاش لا ولكن ؟ وا هي هادي لامابغيتيش تكوني سترونغ اندبندت وومن فالمغرب راه معدل الأجور هابط، شحال النسبة ديال الرجال لي عندهم مدخول ديال عشرالاف درهم ولا عشرين ولا ثلاتين… قليلة طبعا! راه لاماجوريطي فالمغرب عايشين بالسطارطير ! وگاع هاداك لي كايربح ربعين وخمسين ألف درهم واكثر واش كاتسناي منو يقسمها معاك؟ والله يا ميمتك حتى تسكني فالڤيلا ايه وتكون عندك الطوموبيل ولكن البعابع لا شرا ليك شي سكين كير ولا خلص ليك شي كلوب ديال الرياضة ولا برعك ذهوبات، راه الأغلبية الساحقة كاتلقاها الذهب دايراه لراسها و لا جايباه من دار بّاها، ايه هادوك هادوك لي لاباس عليهم ومجوجين ببنات لاباس عليهم راه ماتخايلوش بلي كايرشرش عليها كل نهار، غاتجلسي واكلة شاربة لابسة، بغيتي شي حاجة خارقة للعادة سيري ضبري لراسك.
شي فاتيفلوغات كايصحابهم الحياة ساهلة بالسهولية، وكايتخايلو الراجل فحال شي فانوس سحري غاتحكو وغايخرج يقوليها شبيك لبيك شنو بغيتي؟
تسافيرة للمالديڤ؟ هاكي حبيبة
شي سرتلة ساوية ثلاتين مليون؟ هاكي كبيدة
نبدل ليك الطوموبيل؟ هاكي حبيبة
قنطتي بغيتي ندير ليك مشروع؟ واخا كبيدة..
وهي بالمقابل ماغاتبدل حتى شي مجهود فالحياة غاتبقى غي تحل ليه رجليها من الليل لليل وآطونسيون ماشي ديما تاتكون راشقة ليها حيت هي ماشي جارية … وا فهم تسطى
و لكن الطامة الكبرى هي تلقى مؤثرات وشخصيات معروفة لي كاتروج لهاد الأفكار المغلوطة، السيدة تا شبعات فلوس وماخلات مادارت، ماكينة ديال الفلوس، وطبعا بصحتها وبراڤو عليها ولكن ماشي تجي فاللخر تبيعي العجل للبنات وتخرجي فبودكاست تقولي ليهم مابقيتش بغيت نكون سترونغ اندبندت وومن! قولي ليهم بلي گراص آ ديك السترونغ اندبندت وومن لي هي أنا باش درت اللعاقة كانصوگ الحديد المليح وكانسافر العالم وكاناكل وكانشرب ونخلص الخدامة والما والضو والسكين كير والتجميل واللباس… ولا بصح بصح طلعات ليك السترونغ انديندت وومن فراسك سيري تبرعي بدوك الفلوس لي جمعتي لشي جمعية د النساء فوضعية صعبة راه كاينة لي بغات غا خمسالاف درهم تبدا مشروع ديال البيجامات د تركيا باش تولي سترونغ اندبندت وومن وتصرف على ولادها ومالقاتهاش! سيري تبرعي بالثروة ديالك لجمعية النساء في وضعية صعبة وبداي من الأول وشوفي الشخصية لي ماشي سترونغ وماشي اندبندنت شنو غاتصوري بيها؟ أنا بعدا عارفة، نتي واش عارفة؟
شوفي آ بنتي ماديش على الترهات ديال هاد الحمقات، راه الرجال الأسوياء كايرتابطو بالعيالات السويات، والناجحين كايبغيو الناجحات، والقاريين كايبغيو القاريات والواعرين كايبغيو الواعرات من غير لاطحتي فشي حگار باغية تبقاي لتحت وهوا الفوق باش تجيه الشتفة عليك ساهلة فا سيري قراي وخدمي على راسك وكوني سترونغ اندبندت وومن!
