وكالات//

فواحد الواقعة اللي فيها الطرافة والحزن فآن واحد، واحد السيدة شينوية سميتها “تشاو” قررات تنتاقم من خليلها السابق بطريقة غريبة، بعدما عرفت باللي خداعها.

شنو دارت؟ صيفطات ليه 1000 كيلو ديال البصل، ومعاهم واحد الرسالة صغيرة ولكن فيها بزاف ديال المعاني، كتقول فيها: “بكيت بزاف.. دابا جا دورك تبكي.”

تشاو قالت للصحافة باللي دازت من أيام صعيبة بزاف من بعد ما تفارقو، وكانت كاتبكي بزاف، فالوقت اللي خليلها السابق باين ما متأثرش بزاف وكمل حياتو عادي، بحال لا والو ما وقع. هادشي خلاها تحس بالحڤرة، وقالت: “خاصو هو حتى هو يبكي.. ولكن بطريقتي!”

فواحد من أغرب طرق الانتقام العاطفي، خذات تشاو خدمة توصيل، وصيفطات طن ديال البصل للدار ديال الراجل فمقاطعة شاندونغ. واللي زاد الطرافة، هو أن السائق اللي جاب البصل اضطر يدير حوالي 50 رحلة خلال 5 ساعات باش يفرّغ داك الكم الهائل من البصل قدام الباب.

لكن المفاجأة كانت من جهة خرى، بحيث الراجل ما بكيش كيف ما كانت باغية، بل دار تصرف غير متوقع… جمع البصل وبدأ يبيعو، وربح أكثر من 1000 يوان (يعني تقريبا 147 دولار). وهكذا، الخطة ديال تشاو باش تخليه يبكي، ولات ليه فرصة تجارية ناجحة!