كود السوالم//

شخص فعمرو ما بين 30 و 36 عام لقاوه اليوم مغيب في الطريق المؤدية إلى دوار الخلايف بجماعة السوالم الطريفية اللي تابعة لعمالة اقليم برشيد.

هاد الشخص اللي كان مغيب وقضى الليل البارد ديال البارح الثلاثاء مرمي في الخلا، منين هزوه لسبيطار مولاي الحسن بدار بوعزة اليوم الاربعاء مات.

ولأن البلاصة اللي لقاوه فيها معروفة بترويج المخدرات من (بوفا وحشيش وكوكايين وقرقوبي وحتى الشراب)، من المحتمل أنو تكون الوفاة نتيجة كمية زائدة من المخدرات أدت إلى فقدانه الوعي، ومنين هزوه لسبيطار مول الامانة دا أمانتو.

ولأن الضحية غريب على المنطقة فإن المرجح أنه زبون لعصابة دايرة حالة في دوار الخلايف، كا يطلقو عليها السكان عصابة (ولاد الفاطمي)، حيت الباطرونات ديالها من اسرة وحدة، وفيها ثلاثة ديال الخوت ذكور، وأخت ديالهم، بالإضافة إلى الاب والام ديالهم، كلهم لا شغل لهم غير ترويج المخدرات، اللي حولوا دوار الخلايف بسبابها إلى سوق مفتوحة للمخدرات، كا يجيو ليها المبليين ذكور وإناث، من مناطق مختلفة وحتى من الدارالبيضاء ومدينة الرحمة، باش يتقداو كل ما يشتهون من (بوفا وحشيش وخمور وكيف)، وحتى الكوكايين كا يوفروه افراد هاد العصابة لشباب مبلي ولا مستعد يدير اي شيء باش يحصل على مستلزمات البلية.

ولان الدرك الملكي بالسوالم ما دايرش الخدمة ديالو، حتى مات الضحية عاد تبعوه للسبيطار، وفتحو تحقيق لمعرفة هوية الضحية والأسباب الرئيسية للوفاة، غير هو راه عصابات ترويج المخدرات بالخلايف معروفة بنشاطها الإجرامي، ولكن ديما فالتة من العدالة.