الرئيسية > آش واقع > انتخابات 2021. القيادي الاستقلالي زيدوح فحوار مع “كود”: الأمين العام الوحيد لحزبنا هو نزار بركة وخصنا قوانين انتخابية مستقرة .. وهاش شنو غانقدم لجهة الرباط – فيديو
01/09/2021 18:00 آش واقع

انتخابات 2021. القيادي الاستقلالي زيدوح فحوار مع “كود”: الأمين العام الوحيد لحزبنا هو نزار بركة وخصنا قوانين انتخابية مستقرة .. وهاش شنو غانقدم لجهة الرباط – فيديو

انتخابات 2021. القيادي الاستقلالي زيدوح فحوار مع “كود”: الأمين العام الوحيد لحزبنا هو نزار بركة وخصنا قوانين انتخابية مستقرة .. وهاش شنو غانقدم لجهة الرباط – فيديو

كود الرباط//

قال محمد زيدوح، القيادي الاستقلالي ووكيل لائحة الميزان بجهة الرباط سلا القنيطرة، في حوار مع “كود”، إنه “من الصعب الحكم على القوانين الانتخابية بأنها تساهم في بلقنة المشهد السياسي، قبل ظهور النتائج”، مشددا أن “المغرب يحتاج إلى قوانين انتخابية مستقرة، وماشي كل مرة خصنا نبدلوها فاخير الولاية التشريعية”.

وأوضح زيدوح، في سؤال “كود” حول “من يتحكم في ترشيحات حزب الاستقلال، وهل فعلا حمدي ولد الرشيد هو الأمين العام الحقيقي؟”، بالقول :”الأمين العام الوحيد لحزب الاستقلال هو نزار بركة، واختيار المرشحين مرتبط بالجهات وبتنسيق مع الامين العام للي كيعطي التزكيات”.

https://fb.watch/7LgEfXyjos/

وشدد زيدوح، الذي يقود لائحة حزب الاستقلال للانتخابات الجهوية في العاصمة الرباط، بالقول أن “جهة الرباط تحتاج إلى عدالة مجالية بين اقاليمها وتطوير خدماتها الصحية ويرجع المستشفى الجامعي للمجد ديالو”، مؤكدا أنه “برنامج حزب يركز على قطاعي الصحة والتعليم كثيرا، اضافة الى تطوير وعصرنة عدد من الاقاليم اللي مزال كتعاني ضعف فالبنية التحتية وفالاستثمارات”. اليكم نص الحوار:

“كود”: سبق ليك انتقدت المسار للي مشا فيه حزب الاستقلال..علاش رجعتي وترشحتي باسم الميزان؟

زيدوح:

لا زلت مسؤولا تنظيميا في حزب الاستقلال بالرباط وعندي علاقات جيدة مع الاخوان، وطبعا حنا حزب حي فيه اراء واختلاف.

دخولي للانتخابات عندو اسباب كثيرة، منها أن جهة الرباط سلا القنيطرة عزيزة عليا، لذلك دخلنا بفريق عمل قوي فيه اطر ونساء وشباب ومهندسين ومهندسات وأطباء، هاد الجهة عندها مكانة خاصة تاريخيا وسياسيا واقتصاديا واجتماعيا وخصها كفاءات.

اختارني الحزب نكون وكيل اللائحة. ونتمنى نكون فحسن الظن الساكن.

“كود” نتي ترشحتي فجهة مسيطر عليها البي جي دي، واش كيعني انكم غادي تستفدو من الغاء العتبة؟

زيدوح:

فالحقيقة، مستقبلا خاص يكون عندنا قانون انتخابي مستقر، حيث ماشي كل خمس سنوات خصنا نبدلو فالقوانين، خصوصا وان بلادنا عندها تجربة كبيرة على المستوى السياسي وفالتحول الديمقراطية وفاالممارسة الانتخابية.

بطبيعة الحال صعيب نقولو غاتكون بلقنة أو لا، ميمكنش نجاوبو على السؤال حتى يخرجو نتائج عاد نشوفو، واش حقيقة غاتكون بلقنة ولا غاتكون امور ساهلة لغادي تخلق تكثلات مهمة.

حنا نشوفو، وميمكنش نحكمو على مزايا القوانين الانتخابية الجديدة ونجربو، وموراها نديرو تقييم حقيقي. ودبا من الآن خاص الاحزاب السياسية تشتغل ودير تقييم ونقاش مع وزير الداخلية للي غادي يكون فالمحكومة المقبلة ويتوجدو قوانين انتخابية من الآن ماشي نهاية الولاية التشريعية.

“كود”: حزبكم ولى منهك تنظيميا بسبب الصراعات الداخلية، كيفاش غاتربحو فهاد الوضع؟

زيدوج:

اولا حزبنا ليس منهكا تنظيميا، بل هو أقوى تنظيم حزبي فالمغرب، حزب الاستقلال عندو مناعة باش يتصدا لجميع الاتهامات. ماشي غير اليوم، حنا دوزنا صراعات ومعاركة كبيرة (الانفصال، وانتخابات 63 والسبعينات و84..) هذا حزب عاش فترات صعيبة وقاومنا. وحرية الصحافة على سبيل المثال كان لحزب الاستقلال دور كبير.

بل اكثر هادشي، قاومنا سلوكات سياسية تستهدف الديمقراطية وخلقنا كتلة وطنية باش نواجهو الصعاب فالممارسة الانتخابية.

رغم ذلك، اعتقد اننا غاندوز هاد الانتخابات وغايجي مؤتمر ديال الحزب، وبالتالي نفس جديد وطريقة جديدة فالتعاون.

“كود”: فالترشيحات بانت قوة ولد الرشيد، وكاين لي كيقول ولد الرشيد هو الأمين العام الحقيقي، شنو كتقول؟

زيدوح:

حزب الاستقلال صوت على أمين واحد هو الأستاذ نزار بركة، واللي كيعتبر راسو امين عام وراء الستار شغالو هذاك. حنا كمناضلين وفاعلين عندنا امين عام واحد هو نزار بركة. كنعرفو الامين العام واللجنة التنفيذية واللجنة المركزية.

هنا نهضر ضروري على اختيار المرشحين، فكل جهة كاين مسؤول عضو فاللجنة التنفيذية هو اللي دبر الانتخابات في كل جهة، وبطبيعة حال بتوافق مع الأمين وبتزكية منه، يعني كاين حرية فالتدبير الجهوي وفي نفس الوقت بتنسيق مع الأمين العام.

“كود”: كاينا توقعات كتعطي التفوق لحزب الاحرار فهاد الانتخابات، فالمقابل الاستقلال غايتراجع، كيفاش كتقرا هاد التوقعات؟

زيدوح:

اللي كايدير هاد التحليل يمكن كايديرو ف صالون ديالو وكيتفرج فالتلقزة، هادو تأويلات غير علمية، حيث فالمغرب معندناش الصونداج.

كيفاش حزب شارك فالحكومة وفالتدبير غايجي اللول، واللي كيقول غانزيد الاطر التعليمية والطبية كذا وكذا، علاش مازديتهاش فاش كنتي فالحكومة ونتا عندك وزارة المالية. هاد الكلام عبارة خطاب ازدواجي، تاتشوف الحزب فالحكومة وكيدير المعارضة.

يجي حزب فالحكومة ويهضر كأنه فالمعارضة، وكيقول بغينا نزيدو بغينا نديرو..هادشي كيضر بالسياسة خصوصا الغموض للي كاين فبعض البرامج الانتخابية، ونتا كتسمع شعارات لا تحترم ذكاء المواطنين، برامج بدون منعرفو منين نجيبو التمويلات لهاد الزيادات.

“كود”: نتا غاترشح فالجهة، شنو غاتقدمو للجهة؟

زيدوح:

فالجهة عندنا برنامج، مبني على جوج توجهات، برنامج حكومي قابل للتنفيذ وبرنامج لكل جهة، بطبيعة الحال فجهة الرباط، أولا تاريخ الجهة اساسي فيها العاصمة ومآثر تاريخية مهمة، اضافة إلى تواجد طريق ساحلية مهمة  وأراضي فلاحية عظيمة. هاد الجهة عندها مميز فلاحي أساسي ومميز تاريخي اساسي ومميزات صناعية واستثمارية مهمة (مجمعات صناعية كبيرة في سلا ونواحي الرباط والقنيطرة).

من أعظم المحطات الاستثمارية توجه في هذه الجهة، وبالتالي فبرنامجنا خصنا نحافظو على هاد المكتسبات ونزيدو نطوروها ونوحدوها عن طريق الجهة وتعميمها على باقي المدن (مثلا سيدي قاسم خصها مشاريع فحال القنيطرة ومدن اخرى).

خصنا نجعلو مدينة الرباط قاطرة للتنمية لباقي الاقاليم، حيث ميمكنش تخرج من رباط للي ولات مدينة رائعة جدا، وتمشي لسيدي قاسم تلقى مدينة فيها تجهيزات ضعيفة وغياب التنمية، وهادي مسألة أساسية خاص كاع الاقاليم اللي دايرا بالرباط تكون فيها بنايات عصرية.

“كود”: نتا من الفاعلين فالقطاع الصحي، شنو كتقترح باش هاد القطاع يمشي مزيان؟

زيدوح:

برنامجنا أولا هو الدفاع عن المؤسسات الصحية، اليوم خصنا نعرفو بلي الضعف فالمجال الصحي سبب الرئيسي ضعف اهتمام الحكومة بالمؤسسات الصحية خصوصا المستشفيات الجهوية.

لذلك حنا كنقترحو مستشفيات جهوية مجهزة ومطورة ونعطيوها قيمة، لاسيما في مدينة الرباط، عندنا أول مستشفى جامعي فالمغرب وقرينا فيه وعطينا فيه وتكونا فيه كأطباء وكان هو المرجعية العلمية ديالينا، اليوم ميمكنش نقبلو بالوضعية للي وصل ليها. خصنا نرجعو ليه المجد ديالو لأن مستقبل ابنائنا في اطار تكوينهم علميا. لذلك علاش نمشيو للخارج نقلبو على اخر التطورات في المجال الصحي، وبالتالي خصنا نرجعو ليه الهبة ديالو.

اما التعليم، خصنا نراعيو المؤسسات العمومية، وحنا ابناء التعليم العمومي، بغينا يكون تنافس بين القطاع الخاص والقطاع العمومي باش تكون الجودة. اليوم راه تقدم الدول يرتكز على التعليم والصحة، والدول لي ربحات هاد الرهان صبحات من الدول المتقدمة.

موضوعات أخرى

16/09/2021 22:00

الحركة الجوية بعد انطلاق “عملية مرحبا”.. المطارات ديالنا استقبلات أكثر من 3 مليون مسافر عبر أكثر من 31 ألف رحلة – أرقام

16/09/2021 20:20

حملة كبيرة على المجرمين المتورطين فـ لكَريساج والابتزاز بفاس.. آخرهم “ولد الكرداسية” و”الزيزون” و”الهيلوص” و”لزعر”

16/09/2021 20:00

الجنس مقابل النقط.. الفرقة الوطنية جات ليوم لكلية سطات للتحقيق ف ملف الاستاذ ورئيس شعبة القانون العام اللي حصل كينعس مع الطالبات مقابل ينجحهم