كود ـ أصيلة//

بفارق ساحق، اكتسح حزب الأصالة والمعاصرة نتائج الانتخابات الجزئية بدائرة أصيلة الحضرية رقم 1، بعدما حصل مرشحه عبد السلام الهدوية على 172 صوت، مقابل 72 صوت فقط لمنافسه عبد الرحيم الوديي عن حزب الاتحاد الدستوري. أما مرشح حزب الاستقلال، مصطفى الطليكي، فقد خرج من السباق الانتخابي بثلاثة أصوات فقط.

هاد النتيجة كانت متوقعة عند بزاف من المتتبعين، ولكن ماشي بالحجم الكبير ديال الفارق، خصوصا وأن حزب الاستقلال كان كيمنّي النفس بعودة قوية لهاد الدائرة، لي غاب عليها لسنوات، وكانت محسوبة على الراحل محمد بنعيسى، اللي توفى ف فبراير الماضي وخلق فراغ سياسي فتح الباب لمنافسة شرسة.

لكن المفاجأة الكبرى ماشي ف النتيجة، بل فالحملة الانتخابية ديال الطليكي. فالوقت اللي كانت باقي الأحزاب دايرة لقاءات مباشرة وكتقدم مرشحيها وسط الناس، مرشح الاستقلال اختار يبدا الحملة ديالو من فراش النعاس. دار لايف على الفيسبوك، وهو ممدد ف البيت، كيطلب من “أصدقائه” يصوتو على حزب الاستقلال لأنه “ماشي ديال الطنجرة ولا الحصان‘‘.

الفيديو د الطليكي خلق ضجة وسط متتبعي الشأن المحلي، اللي تساءلو واش هاد الأسلوب التواصلي الجديد داخل حزب عريق بحال الاستقلال ولا غير اجتهاد شخصي من مرشح طاح عليه العياء بكري.

هاد الفيديو ديال المرشح جا بعدما كان الحزب ديالو داير فيديوهات أخرى قبل الحملة، كيستعمل فيها الذكاء الاصطناعي، ما زاد الطين بلة هو أن الحصيلة كانت هزيلة بزاف: 3 أصوات فقط.

بالمقابل، حزب البام رشّح وجه معروفة ف المدينة، واستفاد من إرث بنعيسى السياسي وتنظيمي، وخاض حملة تقليدية ولكن فعالة.