الرئيسية > آراء > انا شخصيا كون كانت عندي مدرسة كنت غانمنع ارتداء الحجاب في النظام الداخلي للمؤسسة للتلميذات و حتى الاستاذات حيت الحجاب ماشي غي لباس عادي و صافي فحال الصاية و الدجين ! الحجاب ايديولوجية اقصائية للمرأة كاتصورها على انها سبب الفتنة و انه الجسم ديالها عورة و انها غير متساوية مع الرجال
18/11/2020 16:00 آراء

انا شخصيا كون كانت عندي مدرسة كنت غانمنع ارتداء الحجاب في النظام الداخلي للمؤسسة للتلميذات و حتى الاستاذات حيت الحجاب ماشي غي لباس عادي و صافي فحال الصاية و الدجين ! الحجاب ايديولوجية اقصائية للمرأة كاتصورها على انها سبب الفتنة و انه الجسم ديالها عورة و انها غير متساوية مع الرجال

انا شخصيا كون كانت عندي مدرسة كنت غانمنع ارتداء الحجاب في النظام الداخلي للمؤسسة للتلميذات و حتى الاستاذات حيت الحجاب ماشي غي لباس عادي و صافي فحال الصاية و الدجين ! الحجاب ايديولوجية اقصائية للمرأة كاتصورها على انها سبب الفتنة و انه الجسم ديالها عورة و انها غير متساوية مع الرجال

سهام البارودي – كود//

بالنسبة لقضية الطفلة القنيطرية لي رفضاتها مدرسة ” دون بوسكو ” حيت دايرة الحجاب شفت بزاف اللغط و التخربيق ! الخوانجية و من حذا حذوهم كايهضرو على “الحرية” و واك واك “علاش واش الطفلة ماشي حرة تلبس شنو بغات ؟”
هذا سؤال مزيان بزاف و من شحال هادي وانا كانبغي نجاوبهم عليه و لكن ماكايفهموش !

اولا باش نقدرو نجاوبو على واش الحجاب حرية و لا لا ! خاصنا نعطيو تعريف الحجاب ! واش الحجاب الاسلامي غي لباس و صافي ؟ فحال الدجين ! فحال الصاية ؟ فحال الفولار د الزواق لي كايديرو العيالات مرة مرة ؟! لا ! الحجاب ماشي غي لبس و صافي ! الحجاب آ سيادنا ايديولوجية كاتآمن بلي المرأة كاتسبب فتنة للرجل بالجسم ديالها و بلي خاصها تغطيه باش ماتخلقش ديك الفتنة! كا و لا ما كا ؟ كنظن گاع لي عارف شوية فالدين غادي يقول كاااااااا!
ثانيا : الحجاب كايصور المرأة على انها ماشي فحال الراجل ! يعني كايضرب المساواة لي بينها و بين الرجل ! هي حيت مرا خاصها تستر شعرها و المفاتن ديالها باش ماتهيجش لينا الغرائز د مولاي السلطان و ينوض يجرها و يغتاصبها فحال كي كان كايدير جدنا انسان الكهوف ! و الراجل بالمقابل ماعليه والو ! يلبس لي بغا و يدير لي بغا حيت مشيكين ماعليه مسؤولية ! المرااا بنت الحرام لي خاصها تبدل المجهود و المرااا بنت الحرام لي تحمل المسؤولية ! مسؤولية شنو؟ مسؤولية انها مرا و صافي ! غي حيت تزاديتي مرا عندك شعر و بزازل و ترمة فراه خاصك حياتك كاملة تغطي داكشي لي تزاديتي بيه باش ماتقلقيش لينا الرويجل!
حگرة و لا مش حگرة دي يا متعلمين يا بتوع المدارس ؟! اقصاء و لا مش اقصاء ده يا متعلمين يا بتوع المدارس؟!

زد على ذلك انه الحجاب اقصائي للمرأة من الفضاء العام حيت ماكايخليهاش تندامج وسط منو فحال امة لا اله الا الله فحالها فحال الراجل ! لا هي مرا اذن هي خاصه تلبس الحجاب فحال ديك النجمة الصفرا لي كانت فارضاها المانيا النازية على اليهود باش يتعرفو يهود ! حنا غانفرضو عليها تلبس الحجاب باش نعرفوها مرا ! عنصرية و لا مش عنصرية دي يا متعلمين يا بتوع المدارس ؟!

بلا مانهضرو على انه فاش وحدة كاتلبس الحجاب كايولي يتمارس واحد النوع من التمييز بينها و بين لي مالابساهش ! كيما قالت التلميذة ديال دون بوسكو ” قالو ليا الله يهدينا حتى حنا نلبسوه” يعني هاديك لي دايرة الحجاب كاتشوف راسها احسن من لي مادايرهاش ! هي على صواب و الآخرات غالطين !

هادشي علاش الحجاب راه جامع فيه جميع معاني الاقصاء و اللامساواة و النظرة الدونية للمرأة و التمييز ! دونك انا شخصيا كون كانت عندي مدرسة كنت غادي نمنع تلميذاتي يلبسوه حيت ماغانبغيهمش يآمنو بهاد الافكار و يشوفو راسهم اقل من الراجل ! و كانظن هذا هوا المغزى من النظام الداخلي لي غايكون فمدرسة “دون بوسكو” !

دابا غانجيو للنقطة ديال الحرية !

اولا الحرية باش نهضرو عليها خاصنا نهضرو على الاختيار ! لاجيت عندك و عطيتك بنانة و تفاحة و قلت ليك شنو بغيتي تاكل ؟ و قلتي ليا بنانة ! فديك الساعة راك كنتي حر انك تختار البنانة ! و لكن لاجيت عندك و عطيتك بنانة بوحدها و قلت ليك نااااري يا الزغبي و ماكليتيش هاد البنانة شنو غايطرا ليك ! غايدوزو الناس و يشوفو ماواكلش البنان و تنوض بيناتهم الفتنة و غاتعذب فالدنيا و الآخرة و فاش غاتموت الله غادي يغضب عليك ! وا هاك ! خود ليك البنان باش تعيش سعيد ! واش هنا كانت عندك حرية اختيار البنان ؟! طبعا لا ! حيت قلت ليك يا البنان يا نار جهنم خالدين فيها ! ايوا راه نفس الفكرة باش كايروجو الاسلاميين للبنان عفوا للحجاب ! لا لبستي الحجاب راك مؤمنة مطيعة عفيفة جميلة أميرة زوجها ! حبيبة أبوها ! راجية رضا الرحمن! مالبستيهش راك عاصية فاسفة تثيرين الفتنة بين صفوف المسلمين! مسخوطة زوجها ! صگعة ابيها ! راجية عذاب جهنم !

فيناهي الحرية في ارتداء الحجاب و نتا اصلا ماعاطيش للمرأة الاختيار بين ارتداء الحجاب و عدم ارتداءه ؟ فيناهي الحرية آ سيموحمد؟

ايوا لاجمعتي و طويتي هاد الاسباب كاملة غادي تفهم علاش انا شخصيا كون كانت عندي مدرسة غانمنع ارتداء الحجاب فيها للتلميذات و الاستاذات تاهوما ! حيت انا بغيت التلميذات ديالي يآمنو بقيم المساواة و الحرية و يكونو متصالحات مع الجسد ديالهم مايشوفوهش فتنة و عورة و ديك الهضرة العوجة ! هادشي علاش كانتفهم موقف مدرسة دون بوسكو و كانشوف بأنه صائب و هوا لي خاصو يكون فالمدارس كاملة لا بغينا نكبرو اجيال ديال المواطنين رجال و عيالات كايآمنو بصح بالمساواة و الحرية و كايتعاملو مع جسد المرأة بشكل طبيعي و عادي.

موضوعات أخرى

27/11/2020 14:30

حوار خاص.. فرحات مهني رئيس حكومة القبايل بالمنفى لـ”كود”: اشتركنا مع المغرب في مقاومة الاحتلال العثماني والفرنسي ونطالب من المملكة المغربية الدعم الدبلوماسي

27/11/2020 14:20

الطفل الزيلاشي اللي كان غابر من الأحد الفايت. البحر لاح الجثة ديالو وتحقيق النيابة العامة هو اللي غادي يبين اش وقع ليه

27/11/2020 13:30

أكذوبة القصف ديال البوليساريو..بنعبد الله لـ”كود”: مشينا على رجلينا بين معبر الگرگرات والحدود الموريتانية بلا حراسة وما مسعمنا لا قذائف ولا والو..كاين غير الأمان والهدوء

27/11/2020 12:30

باسثتناء منيب..زعماء الأحزاب الممثلة في البرلمان من الگرگرات: ثقتنا فالمستقبل التنموي للصحراء ومبقيناش مسوقين لاستفزازات البوليساريو