سهام البارودي – كود//

بزاف ديال السلفيين و الخوامجية المغاربة فرحانين هاد الايام بوصول حركة طالبان للحكم فأفغانستان و عودة الظلام و التطرف لديك البلاد البعيدة لي من نهار عرفناها و هي غارقة فالجهل و التخلف و الاقصاء و الظلامية !
ماعمرنا سمعنا شي خبار زينة من افغانستان ! شي لابوراطوار تما كتاشف شي لقاح ! شي مصنع تما كايصدر شي سيارات مزيانة ! شي بنت تما دات شي ميدالية اولمبية فرمي الجلة….. من نهار وعينا و هي مهد الارهاب و التطرف و الحرب و الدمار ! و هاكاك بعض السلفيين و الخوامجية المغاربة لي عندهم خيخي فالدماغ فرحانين بيها ! واخا موحالش يمشيو يعيشو فيها و يبغيو بناتهم و خواتاتهم يعيشو فيها !

فرحانين و كايتمناو بون شونص لطالبان فتحكيم شرع الله و اقامة دولة الخلافة لي من ديما و هوما كايحلمو بيها و لحد الساعة تاواحد عبر التاريخ ما نجح انه يحققها ليهم و تاواحد ماغاينجح حيت ديك الدولة ديال الخلافة على منهج النبوة و العدل و كدا كاينة غي فالمخيلة ديالهم فحال المدينة الفاضلة !

انا شخصيا كانشوف بلي أي واحد عندو ميول لهاد حركة طالبان الارهابية و فرحان بيها راه لداخل ديالو ارهابي غي مالقاش الفرصة فين يخرج داك الدعشوش لي لداخل ديالو ! و فاش كانشوف عدد السلفيين و الخوامجية لي فرحانين بهاد الخبر كانحمد الله و نشكرو على وجود المخزن فهاد البلاد لي مدخل بنادم سوق راسو !اما كوراهم شتتو لينا الزك شحال هادي فشي قهوة و لا سينيما !

مايمكنش تكون انسان سوي عايش فالقرن الواحد والعشرين و تطبل لحركة ظلامية متطرفة ! و تفرح ليها إلا اذا كنتي فلداخل ديالك ارهابي تانتا وعندك نظرة دونية للمرأة و للآخر لي مختلف عليك و كاتمنى تعيش تحت الراية ديال دولة خدامة بقوانين ديال القرون الوسطى !

آطونسيون من هادو لي فرحانين بطالبان راهم خلايا ارهابية دايرة لاسييست….