سهام البارودي – كود//
شي رباعة ديال الهاترين الهبّل ناضو قاليك اجيو مات اجيو نسنيو عريضة باش الدولة تمنع التفاهة فاليوتوب ! يعني بالعربية تاعرابت آجيو نعيطو للدولة باش تبدى تتدخل فالمحتوى د الناس فحالا حنا عايشين فكوريا الشمالية و لا الصّين و لا مصر !
واش كاينة شي دولة محترمة كادخّل فالمحتوى فاليوتوب ؟ طبعا لا ! ما دام مافيهش تحريض على العنف او البيدوفيليا او الكراهية فراه الدولة ماعندها ماتمنع فيه ! خلّي النّاس تعبر مع راساتها و دير داكشي لي بغات ! لي حمق يعبر على الحماق ديالو و لي باغا تعرا تتعرى و لي باغا تربح الادسنس تربح الادسنس و لي باغي يدير تبسيط العلوم و لي باغي يدير الدعوة ، اليوتوب مفتوح للجميع و من الحماق انه بنادم يبدا يطالب الدولة تتدخل باش تقمع حرية التعبير !
ثم شنو هي اصلا التفاهة ؟ شنو هوا المعيار باش نقولو فلان تافه و فلان لا ؟ انا شخصيا كايجيوني ڤيدوات ياسين العمري تافهين ! و گاع ذوك الظلاميين لي كايديرو الدعوة ماكرهتهمش يطيرو من اليوتوب ! ماكاينتجو لينا تا قلوة ماكانتستافدو ماكانضحكو ماكانستمتعو نفس الهضرة لي كاتعاود ليا هادي 1400عام ! لا جديد تحت الشمس!
وُ مالها التفاهة ؟ كي جاتكم ؟ مخيرة ! مزيانة ! انا شخصيا متبعة گاع هادوك لي كاتسميوهم تافهين فاليوتوب نعيمة الجوك ، نزار السبيتي ، فتيحة، ندى حاسي، ساري كول كانستمتع بڤيدواتهم و حماقهم و داك عدم التسوق لي عايشين فيه و كانشوف فيهم الوجه الحقيقي لبزاف د المغاربة لي مستاعدين يديرو كلشي باش يصورو عومار ! بعيدا عن ديك الطهرانية المزيفة لي كايدافع عليها هايشر ! و التفاهة ماخطات تا بلاد كاينة فميريكان و فرانسا و المانيا و الشينوا … و گاع الدول المتقدمة !
لي مكلخ مكلخ و لي عندو شي ولاد مكلخين راه مكلخين و لي مامربيش مامربيش و لي حمار حمار ! راه ماشي التفاهة لي فاليوتوب هي لي مانعة المغاربة يوليو نوابغ ! راه اصلا المغاربة اصلا عزيز عليهم ديك التفاهة و كايتفرجو فيها ! المغاربة لي كايتفرجو ففتيحة و حاضين ترمة فتيحة و راجل فتيحة و خرية فتيحة ، و اليوتوب كيما فيه الموسيقى و الافلام و الوثائقيات فيه حتى المتعة و نزار السبيتي و القايدة غيتة و سارة العريضة …. و لي قلب على ترمة فتيحة راه غايلقاها !
