سهام البارودي – كود//

الإنتقاء هوا واحد الطريقة ساري بيها العمل فالدول كاملة ! باش تدخل تقرا فشي مدرسة او معهد عريق، او كلية مرموقة، ماشي أي واحد كايدخل بسباطو مثلا لهارفارد و لا الإيم آي تي و لا اوكسفورد و لا يال و لا HEC و لا المدرسة المحمدية للمهندسين، المعهد العالي للتجارة و تسيير المقاولات … جميع المعاهد لي عندهم سمعة زوينة فالعالم و الخريجين ديالهم شادين بوسطات صحاح كاتلقى شروط الانتقاء قاصحة !

نفس الشيء فالمغرب بالنسبة لأحسن مدارس المهندسين و المعاهد، و الله و ماكنتي سيدي و مولاي لاحطيتي ترمتك فيهم ! و هادشي طبعا كاينطابق على كلية الطب لي باش تدخل ليها ضروري تكون جايب نقطة مزيانة فالباكالوريا و دوز كونكور ديال الله و الحق فالماط و الفيزيك، شيمي، علوم الحياة و الأرض…  و شوف تشوف واش تجي فلاليست برانسيبال و لا تطلع فلاليست داطونط ! هادشي كامل طبعا الغرض منو هوا انتقاء احسن التلاميذ المغاربة و اذكاهم و اكثرهم مثابرة و جدية باش يوليو اطباء فالمستقبل و هاد القضية مهمة ! مايمكنش تفتح دراسة الطب لأي تلميذ كيف ماكان بأي نقطة ! ايه واخا يكون باغي ! واخا يكون عندو طموح ! واخا يكون ذكي ! الى ماقادرش يكون عندو مايكفي من الانضباط و لاديسيبلين و الجدية باش يحط زكو فوق كرسي و يجلس يقرا و يبيرابي الباك ديالو باش يجيب نقطة زوينة دخلو لكلية الطب راه ماعندو مايدير مع التلاميذ الاخرين لي ضربو تامارة !

بزاف ديال الناس وسط هاد الازمة د طلبة الطب فأوكرانيا كايبغيو يمرروا رسائل ديال أنه النقطة د الباك ماشي مهمة و الكونكور ماشي مهم و كاينين تلاميذ اذكياء و لكن ماكايجيبوش النقط مزيانة و هادشي كايخليهم يمشيو لبلادات اخرى و و و ! معلوم كاينين تلاميذ مقودين و ماكايجيبوش النقط ولكن علاش ؟ حيت مامنضابطينش ! مامديسيبلينيييش !ماناضجينش! مستهترين بالحياة و بالكفاءة و هاد المبادئ انا بالنسبة ليا مهمة اكثر من الذكاء ! و ملخر ! باش غانعرفوك ذكي اذا ماختابرناكش ؟! الذكاء ديالك تقدر تزيدو فترمتك !

لهاد الاسباب بالضبط كانبغي نتفهم الوضعية ديال طلبة الطب المغاربة لي كايحسو اليوم بالشمتة فاش كايشوفو راسهم جابو الباك بنقطة مزيانة و بميزة مشرفة و دوزو الكونكور و الهايلالة و نجحوا و فاللخر يجيو ديال اوكرانيا ضاربين عليهم الدورة ملهيه و يجلسو حداهم فنفس لونفي! بينما اغلبهم مانجحش فالكونكور فالمغرب و فيهم لي حتى النقطة د الباك ماعندوش مزيانة ! نومال يحس الطالب المغربي بالشمتة ! احساس عادي جدا ! واخا طبعا اكيد كاين بين طلبة الطب فاوكرانيا طلبة اكفاء و بمستوى عالي.

ولكن فنفس الوقت طلبة الطب ديالنا ماكايخليوكش تضامن معاهم ! انا شخصيا ماكانضامنش معاهم فحتى معركة من المعارك ديالهم حيت فاش كانشوف التعامل ديال فئة مهمة منهم من بعد فاش كايوليو اطباء كانكفر ! و كانلاحظ انهم ماكاينوضو يغوتو و يحتجوا حتى كايشوفو المصالح النفعية ديالهم مقيوسة ! ماعمرنا شفناهم دايرين الوقفات و الاحتجاجات و الاضرابات على وضعية قطاع الصحة و ضعف الامكانيات و عدد الاسرة لا ! بالمقابل شفناهم ضد التعيين الاجباري حيت ماكايوافقش مصالحهم هوما لي باغين يبقاو خدامين غي فلاكس كازا – الرباط ! حتى دابا فاش كايغوتو على ادماج طلبة اوكرانيا غرضهم ماشي فالانتقاء و كدا لا ! غرضهم ماتكونش عندهم منافسة لا من اطباء اوكرانيا لا من الاطباء الاجانب و الاستثمارات الاجنبية و لا حتى من طلبة الطب لي فالقطاع الخاص و شحال حاربو التعليم الخاص و شحال حاولو يوقفو الاستثمارات الاجنبية كي مسامر الميدة و هادشي كامل لاش ؟! باش يبقا ليهم المواطن المغربي يگزروا فيه كيما بغاو فالمصحات الخاصة ديالهم ! باش يخلصو بيه الطريطات ديال الميرسيديسات و الڤيلات و الفيرمات و العمارات لي كايستثمروا فيهم بعض الاطباء-الطاشرونات!

واش عقلتو على فضيحة المصحات الخاصة يامات كوڤيد فاش كانو كايضربو عباد الله بمليون مليون و نص الليلة ؟

واش كاين شي اسرة مغربية مامشاتش لشي مصحة و طلبو ليهم النوار ؟!

واش فايت مشيتي لعند شي طبيب واخد معاه رونديڤو و دخلك فالوقت ماخلاكش منشور بالسوايع ! بدون ادنى اعتبار ليك و لا لوقتك و المصالحك لي خليتيها !

واش شفنا شي طبيب اعتارف بخطأ طبي و تحمل مسؤوليتو القانونية و الجنائية و لا غي كايدير فيهم شي واحد شي موصيبة كاينوض اللوبي لي كايدافع عليه يحميه و يقولو للمواطن سير شد فالبولة د التسعين !

ماكاينش المغربي لي مافايتش عانا مع قطاع الصحة سوا فالعمومي او الخاص ! و لا ادنى اعتبار للآدمية د الانسان ! ولا ادنى اعتبار لحالة المرضى و المستوى ديالهم الاجتماعي ! الجشع و الطمع و الاستغلال عمى بزاف ديال الاطباء فالمغرب و هاد الجشع و الطمع هوا المحرك الحقيقي ديال اغلب المعارك ديالهم ! و هادشي علاش صعيب يلقاو لي يتضامن معاهم !

طبعا كاينين اطباء بنات وولاد الناس ! كاينين ناس كايمارسو الطب عن حب ! حيت كايبغيو المهنة و حيت عندهم حس انساني كبير و كايعطيو اعتبار ووقت للمريض و الاسرة ديالو !كاين لي كايغامر و كايضحي و كايعطي من عندو ! كاينين و الله يرحم ليهم الواليدين ! و لكن للاسف ماشي كلشي حيت ديك النقطة فالباك و الكونكور و الكلاسمون كايضمنو ليك تجيب انجب التلاميذ لمهنة الطب و لكن ماكايمنعوش من انك تجيب البسيكوباطات و المرضى النفسانيين و الجشعين و الطماعين لي دايرين الطب باش يترفحو على ظهور عباد الله !