كود كازا ///

واحد لمرا كتقول باللي وراها مسؤول كبير فالديوان الملكي وباللي من عائلتها كاع محيحة فدار بوعزة. كتتبني حمام فوق مطعم إيطالي مشهور موجود قبالة المقر القديم دالجماعة، على مستوى طريق ازمور.

المشكلة انه معندها حتى رخصة، وهاد النوع تاع الحمامات تيحتاج تصميم خاص مصادق عليه من الوكالة الحضرية، ورخص اخرى لانه ايلى دوك السخانات تاع الما وقع فيهم شي حاجة، مصيبة صافي، وزايدون حمام فالطابق الاول وفوق مطعم وجنب جيران بلا شك كيشكل خطر.

المهم هاد المرأة الحديدية كتعمل هادشي خارج القانون والتراخيص والمعايير تاع السلامة، ويمكن شي مستشارة جماعية تعاملات معاها جات حيحات عليها في الجماعة وقالت ليها ردي لي فلوسي.

دابا واش غير بغات تسبق الخلعة باش كلشي يبعد منها، ولا اشنو؟ وزعما داك الشخصية اللي تتوهم الناس بلي معاها واش بصح ولا حتى هوا غير بوعو تتخلع بيه.

الحاصول واقعيا السيدة خداما كتكمل في تشييد الحمام تاعها لي غيكون زعما في أي بي، وخا عشوائي، وفينكم أمالين العمالة ومصالح التعمير ولجنة اليقظة لترشيد استعمال الماء، راه زعما حنا فالجفاف وسيدنا يالاه خطب ووجه الأوامر تاعو باش تكون سياسة ديال الترشيد تاع استهلاك الما يسهرو عليها المسؤولين والسلطة.