كود سبور//

كاينا شكوك كبيرة حول إمكانية إجراء ماتش المنتخب المغربي ضد منتخب الكونگو برازافيل ضمن الجولة 4 من إقصائيات مونديال 2026، بسبب عدم توفر الكونگو برازافيل على تيران فيه شروط كايي دشارج ديال الفيفا، وتهديد الكونگوليين بالانسحاب من المنافسات إذا ما لعبوش فبلادهم.

وحسب الإعلام الگونگولي فاتحاد گونگو برازافيل لكرة القدم رافض إجراء منتخب الكونگو للماتش ديالو ضد النيجر يوم الخميس الجاي فتيران الشهداء فالكونگو الديمقراطية (الكونگو كينشاسا) ضمن الجولة 3 من إقصائيات مونديال 2026، وكيهددو بالانسحاب احتجاجا على عدم الموافقة على إجراء الماتش فالكونگو برازافيل من طرف الاتحاد الدولي لكرة القدم.

وكيبقى مصير ماتش المنتخب المغربي ضد منتخب الگونگو برازافيل مجهول حتى لدابا في انتظار الايام القليلة اللي جايا، ومعرفة واش بصح غاينساحب منتخب الكونگو برازافيل من الإقاصائيات، مع العلم المنتخب المغربي عندو فالبروگرام ديال ماتش ضد زامبيا الجمعة الجايا فأكادير ضمن الجولة 3 من إقصائيات المونديال عاد يمشي يلعب ضد الكونگو برازافيل يوم الثلاثاء الجاي.