گود سبور//

غاتعرض الكورة الذهبية ديال الأسطورة العالمية الأرجنتيني دييگو مارادونا للليع فمزاد علني ففرنسا.

وذكرت رويترز، أن دار أجوت للمزادات قالت اليوم الثلاثاء، الكرة الذهبية اللي خداها دييگو مارادونا كأفضل لاعب فكأس العالم 1986 اللي ربحها مع منتخب الأرجنتين، غاتعرض للبيع فمزاد علني في فرنسا شهر يونيو الجاي، وهادي هي أول كرة ذهبية غاتحط باش تباع فالمزاد، ومازل ما تحددت القيمة ديالها حتى لدابا، وسط توقعات انها تجيب الملايين ملي تحط للبيع نهار 6 يونيو الجاي.

الاسطورة دييگو مارادونا اللي مات عام 2020 وسط جدل كبير حتى لدابا على شنو هي اسباب الوفاة ديالو واش بخطأ طبي ولا إهمال طبي ولا الادمان الكوكايين، وكان ربح الكورة الذهبية ملي ربّح الأرجنتين كاس العالم “ميكسيكو 1986”، بعدما ماركا 5 البيوتا فالمونديال ومن بينها 2 ديال الاهداف تاريخين ضربهم فثمن النهائي على النگليز والأسطورة ديالهم الگول بيتر شيلتون، الهدف الاول ماركاه بيديه، ومن وراها فاش سولوه وتهموه النگالزا بالغش قالهم “يد الرب” اللي ماركانو، والهدف الثاني شد الكورة من وسط التيران وبدا يجري وقلب 5 اللاعبين نگالزا وماركا وهذا الهدف ربح جائزة “هدف القرن”.