كود كازا ////

اليوم مع الثلاثة دالعشية غادي يكون اجتماع مجلس الدار البيضاء فدورة استثنائية. فجدول اعمالها كيف بان فمراسلة لرئيسة المجلس نبيلة الرميلي، “الدراسة والتصويت على اعلان المنفعة العامة ونزع الملكية للقطعة الارضية” ديال “تاور سيڤن ارت” اللي مساحتها 550 متر مربع وكاينة فتقاطع انفا مع الزرقطوني. اي لبلاصة اللي كانت فيها الڤيلا الشهيرة “موفيليي” اللي كانت تراث بيضاوي وتعطات الرخصة باش تريب وتباعت لشي وحدين.

مجلس المدينة كيهدر على “مرفق عمومي محفي” يدار فبلاصتها.

القرار مزيان ويمكن دار بسباب هوية شكون شراها. يمكن الدولة خدات القرار متاخر وما لقاش غير هاد السبب. دابا القضية ديال اللي شراوها وبغاو يديرو فيها اوطيل ماريوت، غادية تمشي للقضاء.

شي وحدين صحاب المشروع دارو لوبي باش يحتافظو بالارض. فشلو. القرار تخاد.

لكن خاص محاسبة اللي عطى رخصة هدم ڤيلا موفيليي” النهار الاول. القرار كياخدو مجلس المدينة مع الوكالة الحضرية. هادو بجوج خاصهم يتحاسبو. ثم خاص الوكالة الحضرية ومديرها يشرح لبيضاوا علاش عطى ترخيص لبناء اوطيل.

ديك مرفق عمومي محلي ما شاداش. الفيلا خاصها ترجع كيف كانت. تعاود تبنى كيف كانت قبل ما تهدم. ديك الساعة تكرى وتستغل شي ادارة او ريسطو. غادية تكون سابقة فكازا