الرئيسية > آش واقع > اليوم حطمنا الروكور فالإصابات والوفيات والحالات النشيطة.. 1499 مغربي تصاب بكورونا و23 ماتو وغير 292 اللي تشافاو.. الطوطال: 36694 تصاب و556 توفاو و25677 براو و10461 كيتعالجو
12/08/2020 17:45 آش واقع

اليوم حطمنا الروكور فالإصابات والوفيات والحالات النشيطة.. 1499 مغربي تصاب بكورونا و23 ماتو وغير 292 اللي تشافاو.. الطوطال: 36694 تصاب و556 توفاو و25677 براو و10461 كيتعالجو

اليوم حطمنا الروكور فالإصابات والوفيات والحالات النشيطة.. 1499 مغربي تصاب بكورونا و23 ماتو وغير 292 اللي تشافاو.. الطوطال: 36694 تصاب و556 توفاو و25677 براو و10461 كيتعالجو

عفراء علوي محمدي- كود//

إخفاق حقيقي لوزارة الصحة فتعاملها مع كورونا، اليوم سجلنا أرقام خيالية وكتخلع فالإصابات الجديدة والوفيات والحالات النشيطة، بينما حالات الشفاء عرفات انخفاض كبير، وبلا مانهضرو على شحال من واحد حالتو خطيرة وكيتلقى العلاج فالإنعاش.

اليوم المغرب سجل 1499 إصابة بكورونا، وهكذا وصل الطوطال لـ36694، أي بمعدل إصابة تراكمي كيساوي 101 لكل 100 ألف نسمة، وبمعدل 4 لكل 100 ألف نسمة فهذ 24 ساعة الأخيرة.

وقال المسؤول على قسم الطوارئ فوزارة الصحة، معاذ المرابط، أن أكبر نسبة ديال الحالات اللي تسجلات اليوم كانت فجهة كازا سطات (498) منها 399 غير فإقليم كازا بوحدو.

وهكذا توزعات الحالات على الجهات والأقاليم:

كازا سطات 498: 399 كازا، 43 سطات، 29 المحمدية، 14 مديونة، 6 بنسليمان، 4 النواصر، 3 الجديدة.
مراكش آسفي 350: 328 مراكش، 17 قلعة السراغتة، 3 رحامنة، 1 فكل من الحوز وآسفي.
طنجة تطوان الحسيمة 172: 135 طنجة، 28 تطوان، 8 النضيق الفنيدق، 1 العرايش.
الرباط سلا القنيطرة 167: 73 سلا، 37 الرباط، 35 تمارة، 9 القنيطرة، 8 سيدي قاسم، 5 الخميسات.
فاس مكناس 113: 66 فاس، 27 مكناس، 7 صفرو، 5 إفران، 3 مولاي عقوب، 2 بكل من تازة وتاونات، 1 بولمان.
بني ملال خنيفرة 97: 73 بني ملال، 13 الفقيه بنصالح، 4 خنيفرة وخريبكَة، 3 آزيلال.
درعة تافيلالت 48: 21 رشيدية، 11 فكل من ورزازات وزاكَورة، 4 فيدلت، 1 تينغير.
سوس ماسة 21: 9 إنزكَان، 6 تارودانت، 4 طاطا، 2 أكَادير.
الجهة الشرقية 13: 4 وجدة، 3 بكل من الدريوش وكَرسيف، 1 فالناظور وجرادة وبركان وكل وحدة فيهم.
الداخلة واد الذهب 13: فالداخلة.
العيون الساقية الحمرا 6: فالعيون.
كَلميم وادنون 1: فكَلميم.

وباطا المغرب اليوم الروكور حتى فحالات الوفيات، 23 واحد مات، منهم 4 فكل من كازا وفاس ومراكش، و3 فكل من الرشيدية وطنجة، و2 فسلا، وحالة وفاة وحدة فسيدي قاسم وتطوان وبنسليمان، وهكذا وصل مجموع المتوفين ل556.

وحالات الشفاء كانت اليوم قليلة بزاف، بحيث تسجلات غير 292، ووصل المجموع لـ25677، بنسبة تعافي نزلات لـ70 فالمئة.

والحالات النشيطة بلغ عددها رقم قياسي، 10461 حالة، أي بمعدل 29 واحد لكل 100 ألف نسمة.

وجهة كازا هي اللي عندها أعلى نسبة دالحالات النشيطة (3243)، تابعاها مراكش آسفي ب2133، بينما أقل عدد ديال الحالات النشيطة كاين فكلميم وادنون (15).

و147 من الحالات اللي مازال كتعالج فحالة خطيرة، منهم 63 تحت التنفس الاصطناعي، وكيتواجدو 44 منهم فكازا سطات (33 تحت التنفس الاصطناعي)، و36 فطنجة تطوان الحسيمة (منهم 9 تحت التنفس الاصطناعي)، و33 فمراكش آسفي (2 تحت التنفس الاصطناعي)، و14 ففاس مكناس (11 تحت التنفس الاصطناعي) والرباط سلا 12 (5 تحت التنفس الاصطناعي) و4 حالات فسوس ماسة (2 تحت التنفس الاصطناعي)، و2 حالات فالجهة الشرقية، وحالة واحدة فكل من درعة تافيلالت وكَلميم وادنون.

واليوم تستبعدات 20807 حالة إصابة بالفيروس، ووصل مجموع ل1479708 خرجات تحاليلهم سلبية.

موضوعات أخرى