الرئيسية > آش واقع > اليوم المغرب حطم روكور جديد فعدد الإصابات بكورونا وسبابو البؤر المهنية: 563 تصابو و61 تشافاو و2 ماتو.. الطوطال: 10907 و8468 متعافي و216 متوفي و2223 كيتعالجو
24/06/2020 17:30 آش واقع

اليوم المغرب حطم روكور جديد فعدد الإصابات بكورونا وسبابو البؤر المهنية: 563 تصابو و61 تشافاو و2 ماتو.. الطوطال: 10907 و8468 متعافي و216 متوفي و2223 كيتعالجو

اليوم المغرب حطم روكور جديد فعدد الإصابات بكورونا وسبابو البؤر المهنية: 563 تصابو  و61 تشافاو و2 ماتو.. الطوطال: 10907 و8468 متعافي و216 متوفي و2223 كيتعالجو

عفراء علوي محمدي- كود//

علنات وزارة الصحة، اليوم الأربعاء، على تسجيل 563 إصابة بفيروس كورونا المستجد فهاد 24 ساعة الأخيرة، وهادي أعلى حصيلة يومية كيسجلها المغرب منذ ظهور الجايحة، وهكذا وصل عدد المصابين فالمجموع لـ10907.

وقالت مسؤولة فوزارة الصحة، فالندوة اليومية للترصد الوبائي لفيروس كورونا المستجد، أن جهة العيون الساقية الحمرة هي اللي سجلات أكبر عدد ديال الحالات (168)، كتبعها جهة طنجة تطوان الحسيمة ب145، ثم جهة الرباط سلا القنيطرة ب112، بعدها جهة كازا سطات ب99، ثم مراكش آسفي ب20، وفاس مكناس ب14، وبني ملال خنيفرة ب4، وجهة كَلميم وادنون بحالة 1، بينما الجهات اللي بقات ما سجلات حتى إصابة.

واغلب الإصابات اللي تسجلات اليوم بانت فمجموعة من البؤر المهنية، بحيث سجلات بؤرة صناعية بالعيون 141 حالة، و112 حالة اللي تسجلات فجهة الرباط سلا كلها بإقليم القنيطرة ببؤرة مهنية جديدة، ثم 93 حالة تسجلات فبؤرة مهنية بمنطقة فحص الأنجرة بإقليم طنجة، وكيتعلق الأمر بشركة تصنيع السيارات “رونو”.

فالمقابل، تسجلات 61 حالة شفاء اليوم، ووصل المجموع لـ8468، بنسبة تعافي د77,6 فالمية.

وتسجلات 2 وفيات جديدة، وهكذا وصل الطوطال لـ216، بنسبة إماتة د2 فالمية.

وارتفع عدد المصابين اللي مازال كيتلقاو العلاج لـ2223، منهم 17 فالإنعاش، 10 فجهة مراكش آسفي، و4 فجهة طنجة تطوان و3 فكازا سطات.

ووصل مجموع الحالات المستبعدة لـ580850 بعد ما خرجات تحاليلهم سلبية.

وهذا التوزيع الجغرافي للإصابات بالنسبة المئوية:

موضوعات أخرى