كود كازا//

الفنان ما كيوقفش غير عند حدود التجربة الفنية، بل كيسعى ديما يعمق الفهم ديالو للفن اللي كيمارس، خصوصا فمجال دقيق بحال التمثيل، وهاد المسار كيجسدو الفنان المغربي ياسين أحجام، اللي غادي يناقش اليوم 3 ابريل 2026 مع العشرة ديال الصباح أطروحة الدكتوراه ديالو بعنوان: “جماليات الأداء التمثيلي: مقاربة تحليلية لنماذج من المسرح والتلفزيون والسينما بالمغرب”، فجامعة ابن طفيل بالقنيطرة.

وفي تصريح خاص لـ”كود”، أوضح الممثل المغربي ياسين أحجام أن هاد البحث كان كيشتغل عليه من 2017، وكيركز فيه على تحليل الأداء التمثيلي فالمسرح والتلفزيون والسينما، من خلال دراسة آليات التعبير الجسدي والصوتي، وكذا العلاقة ديالو بالصورة وبالإخراج ولي الهدف منو هو فهم كيفاش كيتبنى المعنى عبر أداء الممثل، وكيفاش كيتبدل حسب الوسيط الفني وسياق التلقي.”

وأضاف ل”كود” باللي الأطروحة كتنفتح على مرجعيات نظرية مختلفة ففن التمثيل، وكتحاول تقارب التجربة المغربية، مع إبراز الخصوصيات ديالها والتفاعل ديالها مع التحولات الجمالية اللي كيعرفها الفن عالمياً.”

وللإشارة فقط، وبالموازاة مع المسار الأكاديمي، كيبقى ياسين أحجام حاضر فالساحة الفنية، بقوة وثبات حيث كان آخر اعمالو مشاركتو فمسلسل “بنات لالة منانة” اللي عرضاتو القناة الثانية في رمضان واللي جمع طاقم من الممثلين المغاربة المعروفين بحال سامية أقريو ونور الصقلي وعبدالله ديدان وغيرهم ، إذ عرف الجزء الثالث نجاح قوي وحافظ على نفس الزخم الجماهيري وواصل شد انتباه المشاهدين بفضل المواضيع الاجتماعية اللي كيتناولها، واللي خلاته ينافس بقوة وسط البرمجة الرمضانية.