نجوى المالحي-كود//

بنادم في هاد الوقت ولا عندو البوز والفلوس مهمين واخا على حساب أسرار العائلة وحياتو الشخصية. اليوتوبر المعروفة  بـ”أسماء بيوتي” لي كانت دارت شوهة بفيديوهات كتغسل فيهم لراجلها رجليه، ناضت دابا حطات لايفات على اليوتوب كتعطى فيهم  مع عائلة.

https://youtu.be/Axt4sGd3G6k

وطبعا اللايف كان فيه فضيح الأسرار، والسبان والبكا، فالفيديو اللول اسماء كانت مع الام ديالها، وشافوه اكثر من مليون واحد، وزادت فيديو ثاني مع راجلها كتقول ليه “أنا لي طلعتك، وأنا لي رديتك راجل وسيد رجال”، وطبعا مخلات في الوالدين ديالو غير لي نسات، وماشي غير هادشي اسماء دوات على الفيرجينيتي ملي تزوجات راجلها وكيفاش أن حماتها داتها تقلب واش فيياج، وانهم كيعيروها بالعاهرة، وجراو عليها شي مرة من الدار، ومرة ضربوها وصرفقوها، واضافت ان واخا عائلة راجلها لاباس عليهم، عاشت فبيت فالسطح وكانت كتنعس هي وياه على حصيرة…

https://youtu.be/RNl8cJSOK3E

المشاكل العائلية عند كولشي، ولكن هادو حطوها فاليوتوب للمغاربة كاملين باش يشوفوها ويسمعوها، ودابا وليتي فينما دورتي وجهك تلقى فيديوهات اسماء بيوتي وبشرى ديمونتي، اللي سلفات لاشين ديالها فيوتوب لنساب اسماء باش يردو عليها و”يدافعو” على راسهم، وطبعا بشرى عمرات الفيديوهات بالاشهار، شي يتقاتل لايف شي يدخل الفلوس صحيحة… الانترنت في المغرب (وحتى فباقي العالم) ولى بحال شي سوق كبير، عامر بالتفاهة والبالي والمشاكل.

https://youtu.be/SYhhkdxH-tM

امتى المغرب والعالم غادي يديرو حد للتفاهة والبسالة في الانترنيت، ولا صافي هذا العصر اللي عايشين فيه ومن دابا لفوق، اللي بغا يفاريها مع شي حد غيولي يدير فيديوهات، والاخر يرد عليه في لايفات وهي غادية والبشر كيتفرج والفلوس داخلة؟.

https://youtu.be/5kThHvKA1v8