كود كازا//

المغاربة دوزو هاد العام كيبقشو فأنترنت، وحطمو أرقام قياسية فالبحث على مغنيين وشخصيات راس مالهم الهضرة وصافي.

الشخصية لي قلبو عليها في اليوتوب بشكل كبير بزاف هي ساري كول مولات “ها هواااا”، وإلهام بنت الستاتي صاحبت حليوة لي دارت البوز هاد العام، والطفلة بنت خت الكوميدي يسار لي دارت سلسلة سميتها سوحليفة في رمضان وكان أضعف حلقة كتحقق مليون مشاهدة في اليوتوب، ومانساوش مسلسل سامحيني التركي اللي معشش فالطوندوس.

القضية وما فيها اليوتوب المغربي مقودة عليه، والطوندونس يعطيك الخبار، وعموما محرك البحث من يناير لدابا ماكين غير البحث على الأغاني والمغنيين، والفضايح والمؤثرين.