عثمان الشرقي – كود//

المغرب عبر تاريخو كان ديما بلاد التعايش، فيها بزاف ديال المكوّنات اللي عاشت مع بعضها، وكانو اليهود واحد من هاد المكوّنات اللي خلّاو بصمة كبيرة. الوجود ديالهم جا على جوج دفعات كبار: الأولين هما “اليهود البلديين” اللي عاشو هنا قبل الميلاد وامتزجو مع الأمازيغ و، والثانيين هما “اليهود الروميين” اللي هربو من الأندلس من بعد ما طاحت عام 1492، وجابو معاهم تراث الأندلس فالموسيقى، المعمار، والحرف الدقيقة.

فالمغرب، كل بلاصة كاين حي خاص باليهود كيتسمّى “الملاح”، وكان داك الحي بحال قلب كيضخ الحياة فالمدينة. ملاح فاس العتيقة، مثلاً، كان فيه سوق كبير ديال الصياغة، الذهب والفضة، وأزقة عامرة بالورشات ديال الخياطة والتطريز. فالصويرة، الملاح كان مركز التجارة مع أوروبا وإفريقيا، وفمراكش الملاح اللي حدا قصر الباهية كان ناشط من الصباح حتى للّيل، بالصوت ديال الباعة والموسيقيين.

الملاح كان بحال “واد السيليكون” ديال المغرب ديك الساعة، ولكن بدل التكنولوجيا كان مركز ديال الحرف، التجارة، والابتكار. الملاح ما كانش غير حي سكني، بل منظومة اقتصادية كاملة عامرة بالحرفيين والتجار اللي كيبدعو فالصياغة، النجارة، الخياطة، وصناعة الجلود. ورشات صغيرة كتخدم نهار كامل بصمت وحرفية عالية، وكتخرج منتجات زوينة من ماحيا حتى لسلاح.

التجار اليهود كانوا كيصدرو للعديد من الدول، وربطوا المغرب بشبكة عالمية ديال التجارة، من أوروبا حتى إفريقيا وأمريكا. هادشي خلا الملاح مركز اقتصادي حيوي، فيه دماء جديدة كتدفق وتتحرك يومياً.

اليهود المغاربة ما بقاوش غير فالتجارة، حتى فالمطبخ، فالموسيقى، وفاللباس تركو بصمتهم. “الدفينة” اللي كتوجد فالجمعة بالليل، الحلوة المعسلة، البهارات اللي كتطيّب الطاجين بنكهة خاصة… وحتى طريقة التقديم ديال الماكلة بأناقة. فالموسيقى، طوّرو الطرب الأندلسي وزادو فيه ألحان عبرية كتنسجم مع المقامات العربية، بحال ما دارو سامي المغربي وزهور الفاسي وغيرهم..

اليهود المغاربة ما تركوش غير تجارة وحرف، ولكن حتى الثقافة والعادات ديالنا فيها بزاف ديال بصمتهم اللي باقي باين وواضح. من العادات المرتبطة بالمناسبات والأعياد، كيفاش كنا كنحضّرو “الدفينة” ليلة السبت، اللي هي طبق كيحضرو فيه مكونات مختلفة مطبوخة مع بعضياتها، واللي بقاو اليهود معروفين بها وكانو كيشاركو المسلمين فهاذ العادة.

حتى في الحلويات، كاينين وصفات جات من عندهم، بحال الكعب الغزال، الشباكية، والحلوى ديال العرس اللي كانت دائما مزينة بالمسك والعسل. العطرية اللي كانوا كيستخدموها فالطبخ، بزاف منها ولات من أساسيات المطبخ المغربي، كيف الهيل، القرفة، والزنجبيل اللي كتعطي للماكلة ديالنا ذوق خاص.

في اللباس، القفطان والجلابة اللي كنا كنشوفوهم فالأعراس والمناسبات، فيهم بزاف ديال التفاصيل اللي استعاروها من تقاليد اليهود، بحال التطريزات والزواق اللي كيتميّزو بالدقة والجمالية.

الموسيقى كذلك، اليهود المغاربة كانو فنانين كبار، وشاركوا فإثراء الطرب الأندلسي والموسيقى الشعبية، ودخلو ألحان عبرية ناعمة خلات النغم المغربي أكثر غنى وتنوع.

حتى الكلمات والمصطلحات فاللغة المغربية والامازيغية فيها كلمات ذات أصل عبري أو مرتبط بالعادات اليهودية، واللي كيبان أن الثقافة ديالنا هي خليط من بزاف ديال الحضارات اللي تعايشت هنا.

هاد التأثير الكبير اللي تركوه اليهود فينا كيبين أن الفقدان ديالهم ماشي غير غياب ناس، ولكن غياب جزء من تراثنا وهويتنا العميقة.

ولكن فوسط القرن العشرين، الظروف السياسية فالمشرق، وضغط الوكالات الصهيونية، خلات آلاف اليهود يهاجرو لإسرائيل، فرنسا وكندا. وهكذا بدات أحياء الملاح تفرغ، المحلات تسد، والحرف تموت، والمدن تفقد جزء من الروح ديالها.

كون بقاو اليهود المغاربة حتى اليوم، كان ممكن المغرب يكون أقوى فالموسيقى العالمية، وفالأزياء، وفالحرف التقليدية اللي كتدخل العملة الصعبة. كانو غادي يطوّرو التجارة، ويربطو المغرب أكثر بالعالم ونمشيو بعيد حتى فالصناعة.

المغرب ليوم خاصو يتصالح مع تاريخو اليهودي ويقريه لولادو ويكون مستعد فاي لحضة باش المغاربة اليهود يرجعو لبلادهم
لي عاشو فيها الالف سنين ،ياك الوطن غفور رحيم !