كود -وكالات //

تصدر حزب البديل من أجل ألمانيا، المعروف بمواقفو اليمينية المتطرفة، انتخابات ولاية ساكسونيا فشرق ألمانيا.

الحزب خدا حسب التقديرات بين 44 و44.5 فالمية من الأصوات، بفارق كبير على الاتحاد الديمقراطي المسيحي.

وعليه، حزب البديل غادي يكون عندو 39 مقعد فالبرلمان الجهوي، أما الأغلبية المطلقة كتحتاج 42 مقعد.

هاد النتائج ممكن تفتح الباب قدام وصول حزب من اليمين المتطرف للحكم على مستوى ولاية ألمانية، وهو سيناريو ما تحققش فـألمانيا مني سالات  الحرب العالمية الثانية.

شنو كيعني هاد الصعود؟

النتيجة ديال حزب البديل من أجل ألمانيا كتبيّن باللي اليمين المتطرف ولى عندو حضور قوي فعدد من المناطق، خصوصاً فشرق البلاد، ولكن الفوز فالصناديق ما كيعنيش بالضرورة أن الحزب غادي يقدر يحكم بوحدو، حيث النسبة ديال المقاعد اللي غادي يحصل عليها هي اللي غادي تحسم فشكل الحكومة الجاية.

الصعود ديالو كيعكس حتى واحد التغيير فمزاج جزء من الناخبين، اللي كيربطو التصويت للحزب بمواضيع بحال الهجرة، الأمن، وغلاً د المعيشة، وفالمقابل، باقي الأحزاب مازال كترفض التحالف معاه، وبالتالي حتى إلا تصدر الانتخابات بفارق كبير، يقدر يلقى راسو قدام صعوبة كبيرة باش يحول هاد التقدم الانتخابي لنفوذ فعلي وسط الحكومة.