كود احمد الطيب ///

والي الرباط اليعقوبي معروف عليه الصرامة. معروف عليه تطبيق القانون. غير دار حتى دار وحصل فداك الشي اللي واقع ف”لامارينا” ديال بورگراگ. هنا كاين اللا قانون. وصلوه شكايات من السكان على خروقات كثيرة ووالو. شاف ڤيديوات على صحاب شي ريسطورات كيقولو باللي محميين من الفوق٬ ووالو.

البارح بقات السهرات الحية حتى اش من وقت فالوقت للي نفس السهرات ممنوعة فنفس البلايص فالرباط وفمدن اخرى. واحد عندو مطعم تماك ولى اليعقوبي كيخاف منو ماشي هو يخاف من الوالي.

خاص غير تطبيق القانون. هنا السي اليعقوبي فشل فيها. ربحو ابديل وتحداه كيف تحدى جميع السلطات فالعاصمة.

هاد “لامارينا” ولات ارض مشاع لخرق القانون. شفنا ديك النهار اش دارو الزعيترات دابا كايين شي صحاب الريسطورات. اللايف والنشاط. هاد الشي ما كرهناش يكون فالبلاد كلشي وباحترام للرخص المسلمة من السلطات.

راه عشرات الشكايات تقدمات. علاش حتى حاجة ما تغيرات؟

اليعقوبي وغيرو من السلطات عاجزين قدام مول ريسطو. فهاد الحالة خاص المساواة فعدم تطبيق القانون وصافي. مع لطناش الليل كان الخاشي والزرزور كيبانو غير ف”لامارينا” على ودنين الوالي وخاف منهم.