گود سبور-وجدة//
اعتبر جواد الياميق مدافع المنتخب الوطني المغربي، عندو مشاكل فالمنظومة كاملة وماشي غير فالدفاع، واكد ان الرباح على النيجر ضمن اقصائيات كاس العالم 2026، هو المهم، بعدما صعبو على ريوسهم المباراة.
وقال جواد الياميق فتصريح لجورنال “گود” بعد المباراة ضد النيجر، اللي ربحوها الأسود بنتيجة 2 لواحد: “الماتش ضد النيجر كان صعيب وحنا اللي صعبناه علينا، وفالشوط الثاني صححنا بعض الأخطاء وقدرنا نرجعو ونربحو، والاهم فهادشي هي 3 نقاط باش نبقاو متصدرين للمجموعة”.
وسول “گود” الياميق على شنو غايخدمو باش يصححو اخطأ المنتخب المغربي، وقال: “بالنسبة ليا المشاكل فالمنتخب المغربي ماشي غير دفاعية ولكن المنظومة كاملة، وكانحاولو نصححو جميع الأخطاء لا دفاعيا ولا هجوميا ومازال عندنا الوقت باش نصححوها”.
