كود بني ملال//

تهزّات الطريق الوطنية رقم 307 الخطيرة اللي كتوصل بين دمنات وسكورة عبر أيت تمليل، اليوم السبت، على وقع حادثة سير خطيرة وقعات فدوار لحوانت، من بعد ما تقلبات طوموبيل من نوع “طرونزيت” كانت هازة مجموعة ديال الدراري الصغار.

وحسب المعطيات اللي توصلنا بيها، الحادثة تسببات فموت ستة ديال الناس فبلاصتهم، منهم أربعة تلاميذ، السائق، وراكب آخر. وزيد عليهم ستة دراري آخرين تجرحو بزاف وتنقلو استعجالياً للمستشفى فحالة خطيرة باش يتعالجو.

المصادر المحلية قالت باللي هاد التلاميذ كيقراو فإعدادية سيدي أحمد بناجي فغسات، وكينعسو فدار الطالب فالمنطقة، وهاد الشي كيعني أن الطوموبيل اللي تقلبات ماشي ديال النقل المدرسي، ولكن غير طرونزيت كيستعملوه الناس فالتنقل اليومي بين الدواوير والمركز.

بعدما وقعات الحادثة، جاو الدرك الملكي والسلطات المحلية لبلاصة، دارو المعاينة، تنقلو الجثث لمستودع الأموات، وفتحو تحقيق بأمر من النيابة العامة باش يعرفو الأسباب الحقيقية ديال الكارثة.

هاد الفاجعة كتعاود تذكّرنا بالمشكل الكبير ديال السلامة الطرقية فالمناطق الجبلية والبعيدة، اللي الطرق فيها مزرية ومليانة حفر ومنعرجات خطيرة، واللي دايماً كاتهدد أرواح الناس، فغياب الصيانة المنتظمة للبنية التحتية.