سامي العلوي -كود كازا //

علمت “كود” من مصدر خاص أن القضية اللي كيتابع فيها منعش عقاري مشهور فكازا والمحمدية، ومعاه برلمانيين ومنتخبين سابقين وحاليين من مجلس مدينة كازا، وكذا محافظ سابق، او لي العدد ديالهم 13 واحد تحالت على أنظار النيابة العامة بالمحكمة الابتدائية الزجرية عين السبع.

والمصدر نفسو أكد أن الوكيل العام للملك بمحكمة الاستئناف فكازا قرر يحيل الملف على المحكمة الزجرية بعين السبع لعدم الاختصاص، من بعد ما شاف من خلال تفاصيل القضية اللي كتشير لاحتمال وجود تلاعبات فعالم العقار، واستغلال النفوذ، وحتى تزوير فوثائق رسمية.

المنعش العقاري اللي معني بهاد الملف معروف بزاف فالميدان، وكيملك ثروة كبيرة بزاف.

ومن خلال التحقيقات الأولية، تبين أن حتى محافظ سابق ضمن المشتبه فيهم فهاد القضية.

وذكرات مصادر مطلعة أن النيابة العامة بعين السبع بدات فعلاً كتستمع لعدد من الأطراف المعنية، من ضمنهم المنتخبين والمسؤولين اللي تذكرو سمياتهم فالملف. ونفس المصادر كترجح أن التحقيقات غادي تخرج بمعطيات خطيرة فالأيام الجاية، خصوصاً مع تواجد أسماء ثقيلة فلوائح المتابعة.

والمثير فالأمر، أن النيابة العامة بعين السبع جندات خمسة نواب وكيل ملك باش يتكلفو بهاد الملف اللي بدا كيكبر وكيكشف على خبايا خطيرة فالعقار والسياسة.