عمر المزين – كود///

خرج الوكيل العام للملك لدى محكمة الاستئناف فكزا ببلاغ جديد علت قضية وفاة الحقوقي “سيون شمعون حريم بروخ أسدون” اللي كانوا لقاوه ف19 غشت الفايت فدارو فحالة إغماء وتهز للصبيطار.

داك الساعة، حسب بلاغ للوكيل العام، توصلات بيه “كود”، كانت النيابة العامة وجهات تعليماتها للشرطة القضائية باش تدير بحث بخصوص هاد الواقعة واللي كانت نتائجو محل بلاغ للرأي العام فالوقت.

المصدر نفسو كشف باللي أنه فبتاريخ 7 نونبر 2025 تم الإشعار ديال النيابة العامة هاد الوفاة، حيث أمرت فإطار البحث اللي كتشرف عليه باش يتدار ليه تشريح طبي على جثة الهالك عهد به للجنة طبية ثلاثية تتكون من أطباء اختصاصيين في الطب الشرعي.

الوكيل العام فكازا كشف باللي نتائج هاد التشريح أسفرت عن كون هاد الوفاة ناتجة عن مضاعفات تعفنية لإصابة رضية على مستوى الرأس نجم عنها نزيف على مستوى سحايا المخ ورضوض مخية وكسر على مستوى الجمجمة، وهي خلاصات ترجح فرضية سقوط الهالك من السلم حينما كان يقوم بتشذيب حديقته.

وأضاف المصدر باللي النيابة العامة غادي تاخد القرار القانوني المناسب فور  انتهاء الأبحاث.