كود كازا//

هضر الوكيل العام ديال كازا، اللي قليل ما تيبان فشي تصريح، وكانت المنسابة هاد المرة هي افتتاح السنة القضائية، الخميس اللي فات. ووقف صالح التيزاري وهو تيشرح ويعطي الإحصائيات تاع النيابة العامة، ونسبة الاعتقال وترشيد تاعو، وعطى أدلة قطعية بأن الاعتقالات اللي تمات في 2024، كلها انتهت بأحكام إدانة، بمعنى أنه حتى واحد من المعتقلين ما خذا البراءة، يعني أن الاعتقال كان في محلو، لأنه حسب التيزاري، قبل اتخاذ هاد القرار النيابة العامة تتستحضر قرينة البراءة وتتدرس الملفات بالشكل المطلوب.

التيزاري في الكلمة تاعو المطولة، هضر على كلشي، حتى على السماسريا اللي تيدورو بالمحكمة، حيث نهج واحد السياسة تاع الحزم، قلصات من عدد اللي تيبيعو ويشريو فالمرتفقين، سواء بالأماكن العمومية أو الفضاءات القريبة من المحكمة، ونزلات نسبة الموقوفين بهاد التهمة ب خمسين في المائة، ووضع بلي 9 دالمتهمين اللي تشدو في 2024، بعد ما سجلت 2023 18 قضية تشدو فيها 18 متهم.

ومنساش الوكيل العام يشكر المصالح الأمنية والفرقة الوطنية اللي تتبذل المجهودات في هاد الإطار.

التيزاري اللي متيعرفوش، هو إنسان هادئ وتيخدم بالعقل، وهادشي اللي لاحظوه المتتبعين، خصوصا في قضايا السطو على العقارات، تيعطي الوقت للملفات في البحث والدراسة، ولكن ما تيزكلش اللي عندو أدلة تتورطو، والفرقة الوطنية ولات عندا فريق خاص تيتبع تعليمات الوكيل العام في هاد الملفات اللي تتزعزع الأمن العقاري، وااللي مورطين فيها ريوس كبار، ولأن القانون فوق الجميع، والبراءة هي الأصل، فسلكة الملاءمة متتزربش وتتخدم بالعقل والأدلة، وحتى واحد ما غادي يتزكل.