كود ياوندي ///

فياوندي فنهاراتها الطويلة اللي ما فيها ما يدار وفلياليها اللي فشي شكل٬ خاصك لوناسة. كاينة وفود لدول مشاركة فالكان جات باعداد كبيرة تقدر تخلق اجواء وكاين وفود لقات صحابها وتقريبا عايشين مجموعين.

ففندق “هيلطون” اللي نورمالمون هو المقر الخاص بالكاف فهاد الكان بالكاميرون٬ ما يتفارقش الوفد المغربي مع الوفد المصري. كاينة علاقة صداقة قوية بين فوزي لقجع رئيس الجامعة الملكية المغربية لكرة القدم وهاني ابو ريدة رئيس الاتحاد المصري السابق لكرة القدم وبجوجهم كاينين فعضوية المكتب التنفيذي للاتحاد الافريقي لكرة القدم وحتى فالفيفا.

بين فوزي وابو ريدة علاقة صداقة بصاح. وفد الدولتين كيف عاينات “كود” فبداية هاد العرس الافريقي٬ اكثر من صحاب. تلقاهم يفطرو مجموعين فلوطيل ويشربو قهوة مجموعين ويتغداو مجموعين ويتعشاو ف”فايموس” بالليل مجموعين.

تلقى ابو رينة مع احمد مجاهد اللي كان مكلف بادارة شؤون الاتحاد المصري لكرة القدم حتى بداية هاد العام اللي تم انتخاب رئيس جديد٬ كيشرب قهوة مع فوزي لقجع باش كان فياوندي قبل ما يرجع للمغرب ويعاود يرجع للكاميرون٫ ومعاهم بيضي رئيس الوفد المغربي ونور الدين النايب ومحمد مقروف مستشارا الجامعة ورئيسها وايت منة هشام رئيس نادي شباب المحمدية.

اللي فارقهم هو باش رجع فوزي للمغرب ومشاو المصريين يشوفو ماتشات بلادهم فمدينة بعيدة عن ياوندي.

هاد الوفدين اللي تقريبا كيشكلو وفد واحد اليوم غادي يكون فيهم واحد فرحان واخر مضيوم حزين. اليوم لاعب المنتخب المغربي لكرة القدم فربع النهاية ضد المنتخب المصري.

المصريين خايفين اكثر من الاسود. حاسين باللي عندنا منتخب واقف على رجليه. شاد فراسو. عارفين باللي محمد صلاح ماشي هو ابو تريكة اللي يقدر يكون قائد حقيقي للمنتخب. يكون مسؤول علي انتصاراتو. لعاب كبير اخر ولكن ماشي قائد. لحد الان ما زال ما بانش بهاد الصفة.

المهم الليلة فمطعم “فايموس” بياوندي غادي كون شي يشرب نخب الانتصار ولاخر يداري هزيمتو.

اكيد غدا فالصباح غاديين يفطرو مجموعين. اي ان هاد الماتش ما غادي يغير والو فعلاقاتهم