كود ـ كازا//

هادشي اللي تيوقع فسبيطارات كازا، ما كيتفهمش، تكررات فيها وقائع كانت كتلزم على وزير الصحة يتدخل فيها ويبين للمغاربة بلي كاينة المراقبة والبحث، ولكن لمن تعاود زابورك أداوود، فكيفاش تمشي لجنة تفتيش مركزية، لسطات، الجمعة اللي فاتت، غير لمجرد شبهة أو اشتباه بللي شي واحد تيصيفط المرضى للمصحات، بينما فكازا الطايح كثر من النايض وشي ماكاين، ها اللي تعما.. ها اللي ولدات في الشارع.. ها اللي قتل المرضى دالأعضاب والدماغ، وزيد وزيد.

آخر ما وقع كان ف سبيطار الهاروشي، واحد المراة جابت ختها تولد ولادة طبيعية، و(سطرو على طبيعية) دخلاتها وبقات تتسنى برا، مكاينش اللي يسول فيها، وحتى التحاليل بقاو عندها، وشدو الحاملة لداخل، حتى صفاوها ليها عاد خبرو ختها من طرف شي حارس أمن خاص بلي إلى بغات تشوف ختها تمشي عندها لامورك، زعما لمستودع الأموات.

الفضيحة أن شي سطاجير في البروميار أني هو اللي دار ليها البنج بدون حضور رئيس القسم، والفضيحة أيضا، كيفاش دوزو المراة من ولادة طبيعية لسيزاريان، رغم أنها والدة ديجا طبيعي.

هنا نذكرو أن الوزير كان مشا للدريوش يجري باش يقلب ف شي سبيطار تما على بريز تاع الضو، وبدا تيغوت ملي ملقاهش حينت داك البريز خصو يكون في ديك القاعة، وتيعاتب الطبيب وخا أن البريز اللي مداروش هو الطاشرون، فهاد الحالة واش خاص نحيدو البريزات للي فسبيطار الهاروشي باش يجي الوزير، بما أن الناس للي كتموت بسباب الأخطاء الطبية ماتتحركوش؟؟.

المهم السيدة ماتت وذنبها على اللي كانوا سباب، لكن البحث خاص يكون نزيه ويمشي لجهة محايدة ماشي رئيس القسم اللي دار الفضيحة هو اللي فاتح لونكيط..