عمـر المزيـن – مكتب الرباط//
في الوقت اللّي طالبو فيه عدد من البرلمانيين داخل لجنة المالية والتنمية الاقتصادية بمجلس النواب، اليوم الخميس، باتخاذ القرار ديال تسقيف الأسعار لمحاصرة الشركات ديال التوزيع اللّي كتدخل أرباح كبيرة بزاف، قال لحسن الداودي الوزير المكلف بالشؤون العامة والحكامة، أنه “يلا دار شي حاجة خاص يستافد منها المواطن بالدرجة الأولى”.
وقال الوزير الدوادي، في تصريحات لـ”كود”: راه يلا بقينا كنغنيو ونقولو بغينا “سْقوفا سْقوفا” وتخرج خاوية راه غادي يضحكو علينا الناس وخاص مني دير شي حاجة يلقى فيها المواطن المصلحة. والمصلحة ماشي هي نقولو سقفت بلا فايدة”.
وكشف الداودي: “راه الشركات وجدُو راسهوم للتسقيف وهبطو الربح ديالهوم وأنا حاضيهوم ويلا اطلعو الأسعار غادي نسقف وهاد القرار راه باقي فيدي ويلا استهلكت الوقت ديالي مشا كولشي من بين يدي لكن غادي نبدا الحوار معاهوم من دبا جوج أسابيع”.
وبخصوص الأرباح اللّي كتضرب هاد الشركات، أوضح الوزير الداودي لـ”كود”، قائلاً:”الهامش ديالهوم ارجع للهامش العادي تقريبا ورجعو لداك الهامش لقديم وكاين تقريبا شي زيادة ديال 5 أو 6 ديال السنتيم. وتجي تقول للمغاربة راه حيّت ليك 5 ديال السنتيم من اللتر راه هادشي معندو حتى شي معنة”.
وختم المسؤول الحكومي تصريحه مع “كود” قائلاً: “راه حنا مكنلعبوش مع المغاربة وكنقولو الصراحة ودبا ماشي وقت التسقيف حقاش مافيه فايدة وانهار تكون فيه غادي انديروه. وراه الكورة بيدي الآن لكن منقدرش نخرجها خاوية وأنا صريح مع المغاربة ولعصا اللي عندي يلا ضربت بها دبا مشات ليا”.
