كود – أزيلال //

فاطمة الزهراء عمور، عضو المكتب السياسي ديال حزب التجمع الوطني للأحرار ووزيرة السياحة، قالت بلي الحكومة دارت حصيلة كتجمع بين الدولة الاجتماعية ودعم الاقتصاد، وإن جهة بني ملال خنيفرة بدات كتقطف ثمار هاد الدينامية.

عمور، اللي كانت كتهضر عشية الاثنين فلقاء تواصلي فبني عياض فأزيلال، قالت بلي الأحرار اختارو من 5 سنين «مسار التنمية»، واعتبرت أن هاد الطريق  كان بفضل «الشجاعة والكفاءة» ديال رئيس الحكومة عزيز أخنوش والفريق الحكومي.

فالسياحة، الأرقام اللي قدماتها عمور كبيرة، 20 مليون سائح فـ2025 و92 ألف منصب شغل جديد، وقالت بلي جهة بني ملال خنيفرة حتى هي استفدات من هاد الحركية.

عمور رجعات لملف مطار بني ملال، وقالت بلي إعادة فتحو كانت من بين أولى الإجراءات اللي تحركات عليها الوزارة، من بعد ما تطرح ليها مشكل الإغلاق فأول زيارة ليها للجهة.

واليوم، حسب عمور، المطار ولى مربوط بـ4 وجهات: مدريد، برشلونة، خيرونا وطنجة.

وحسب الوزيرة، دعمت لوطيلات من بعد كورونا، وخدمات على تأهيل عدد من المواقع السياحية المعروفة فالجهة، بحال شلالات أوزود، بين الويدان وعين أسردون.

وزادت أن 100 مليون درهم تخصصات لتشجيع المقاولات السياحية اللي كيقودها الشباب، فبرنامج استفدات منو الجهة.

الأثر، حسب الأرقام اللي عرضاتها عمور، بان فليالي المبيت، الجهة زادت 120 ألف ليلة مبيت، وتزادو 700 ناموسية، و طلعات نسبة الريزفاسيون من 29% لـ36% .

وبالنسبة للوزيرة، هاد الأرقام كتعني أن بني ملال خنيفرة ما بقاتش غير محطة كيدوز منها السائح فالنهار ويمشي، ولكن ولات وجهة كيبقى فيها الزائر مدة أطول.

والرهان الجاي كيرتبط بمشاريع جديدة، من بينها «دينو بارك» فأزيلال و**«المحطة الخضراء» بخنيفرة**.

عمور قالت بلي الغرض هو بني ملال خنيفرة تولّي من أكبر وجهات السياحة الطبيعية فالمغرب.

وعلى المستوى الانتخابي، قالت عمور بلي 5 سنين ديال الحكومة خلات الأحرار يعرفو مزيان المشاكل اللي كيعاني منها المغاربة، والأهم، حسب كلامها، يعرفو كيفاش يهبطو البرامج والإصلاحات لأرض الواقع.

البرنامج الانتخابي ديال الحزب، حسب عمور، مبني على 3 التزامات كبار: حماية القدرة الشرائية بشكل دايم ، تحسين الخدمات العمومية، وتحقيق الإدماج الاقتصادي بخلق مليون منصب شغل وتقليص البطالة.

وأكدت أن الطريق لهاد الهدف كيدوز من مضاعفة الاستثمار، باعتبارو المحرك الرئيسي لخلق فرص الشغل للشباب.

كما علنات على رفع مدة الاستفادة من «منحة العودة إلى الشغل» من 6 شهور لـ12 شهر بالنسبة للعمال اللي كيفقدو الخدمة ديالهم.

وبالنسبة للعمال الموسميين، كاين توجه لإحداث بطاقة خاصة بهم، كتضمن ليهم حقوق مرتبطة بالتغطية الصحية والتقاعد، وتعطيهم الأولوية فالرجوع للخدمة.

وفالرسالة السياسية الأخيرة ديالها، شددت عمور على أن «المصلحة العامة والمواطن، والمواطن فقط» هي الأولوية ديال الحزب.

وقالت بلي  5 سنين ما كافياش باش تكمل جميع الإصلاحات اللي بدات فالولاية الحالية، قبل ما تدعي الناخبين يصوتو للأحرار نهار 23 شتنبر، واعتبرت  أن الاختيار اللي غادي يديروه غادي يحدد، حسب تعبيرها، «المستقبل ديال وليداتكم وحفادكم».