كود الرباط//

تداعيات تصريحات وزير العدل السابق محمد أوجار، وصلت لاجتماع لجنة الداخلية بمجلس النواب، خصوصا وأن أوجار هضر على الولاة والعمال، وقال بلي الدولة العميقة تتحكم في الوزراء والمنتخبين ومعندهمش هامش فالتسيير، وبلي المحاسبة خصها تشمل الولاة والعمال بحال المنتخبين.

فاطمة الزهراء المنصوري، وزيرة إعداد التراب الوطني والتعمير والإسكان وسياسة المدينة، خلال اجتماع لجنة الداخلية بمجلس النواب، تفاعلت مع مداخلة البرلماني الاتحادي محمد ملال للي تكلم فيها على خرجة القيادي في حزب الأحرار محمد أوجار.

وقالت المصنور بلي: “اليوما يخرج بشي خطاب لي تيصور عمل الأحزاب السياسية بهاد الطريقة ولا لي بغا يدير فيها ضربني وسبقني وشكا واللي بغا يتبنى شي دولة عميقة، حنا بعدا كا حزب سياسي ماكيتحكم فينا حتى حد”.

وأضاف المنصوري: “ميمكنش نساند قيادي يهين الأحزاب والمنتخبين وكيقول متحكم فيا. ياريث يجي شي واحد يتحكم فيا، والمجلس  الجماعي كيقول كلمتو . كنأمن بمنطق الأغلبية وماشي بمنطق التحكم”.

وأوضحت المنصوري بأنها فعلا وزيرة سياسية ومارستها أكثر من 18 سنة، مشددة بلي “بغينا المزيد من الديمقراطية وكنآمن بأهمية الانتخابات والعمل الديمقراطي”.

وأكدت المنصوري بأنه لا داعي لإطلاق الكلام على عواهنه، خصوصا وأن تدبير القوانين الانتخابية تم في إطار من التشاور والديمقراطية وخضعت للنقاش بتعليمات من الملك. مشينا وخضعنا للقانون. ودازو بالمصادقة”..

وتابعت: “كاينين مشاكل فالأحزاب كيف كاينين فالمجتمع وحتى فالأسرة.. خصنا المزيد من التخليق والعمل والتواصل”.

وأضافت: “أنا ديما في السياسة دوزت خمسة حملات انتخابية مقتنعة بأن الديمقراطية هي الطريقة الواحدة والجيدة باش ندبرو هاد البلاد، وحنا بغينا  المزيد من الديمقراطية”.