عمـر المزيـن – مكتب الرباط//

عاتبت  سمية بن خلدون الوزيرة المنتدبة السابقة لدى وزير التعليم العالي ف الحكومة ديال بنكيران في اتصال أجرته معها “كود” عاتبت  بشدة الناس لي كيهضرو على الزواج ديالها بالوزير السابق لحبيب الشوباني، ورفضات شي حد يهضر معاها على زواجها لي كشفات عليه اليوم ف  الفايسبوك.

القيادية السابقة ف صفوف “البي جي دي” قالت بالحرف: “خاص الناس تهتم بالمعلومات المهمة ديال الإنجازات وغيرها لي مع كامل الأسف لا يهتم بها أحد وانا مفهمش والرأي العام مديهاش كاع ف الفايس ولا يهتم به والرأي العام باغي يشوف الانجازات شنو كاين ف ارض الواقع”.

وأوضحت بن خلدون أن داك الإعلان ديال الزواج لي دارت ف الصفحة ديالها  اليوم على الفايسبوك  عندو علاقة بالتحيين ديال معلوماتها وصافي”. يعني بغات تقول أنها انهار الأول لي دارت الفايسبوك انسات مدارتش “mariée”

وأضافت قائلة: “هادشي راه التخربيق وفاش غادي يهم شي حد وسوق شكون وعلاش مكيدوهاش ف الاشياء المهمة ولا يعقل بنادم يتبع الأمور الشخصية ودبا قررت نحذف هاد المعلومات يلا كان هاد الرأي العام متبع غير هاد الخزعبيلات ونهني الناس مني وهادشي والله معقول”.

وزادت بن خلدون: “أنا عاد رشق ليا نحيّن هاد المعلومة اليوم وفين كاين المشكل واللّي كيسول على هادشي بالنسبة لي لا يفهم الفايس ولا التويتر ولا الواتساب والناس عندهوم خلل وسوء فهم”.