كود ـ سبور//

عبد الرحيم الوزاني، خرج بتدوينة نارية هزات الرأي العام الودادي، واتهم فيها رئيس نادي الوداد آيت منا بالكذب والتلاعب فملف الشركة الرياضية، محذّرا من عقوبات خطيرة من طرف الفيفا والكاف، إلا وصلات هاد المعطيات للمؤسسات الدولية.

الوزاني بدا كلامو بعبارة قوية قال فيها ان: “حبل الكذب قصير”..  “ما كاينش أذل من اللي ينكشف كذبو في واضحة النهار.”

وقال بأن ايت صرّح بأنه حيّن السجل التجاري لشركة الوداد (ش م)، لكن الحقيقة – حسب الوثائق اللي عرضها الوزاني – أن السجل التجاري ما تبدّلش، وأن الناصري مازال هو الرئيس وممثل أسهم الجمعية، وهاد الشي كينفي كلامو.

الوزاني زاد مخاطبا هشام ايت منا: “قلتِ بأن الجامعة عطاتك رخصة استثنائية (dérogation) باش توقع عقود اللاعبين، وهادشي كذوب، ما كاين حتى وثيقة من هاد النوع فالجامعة.”

وأكد أن العقود اللي موقعة باسم ايت منا كرئيس مدير عام للشركة باطلة ومزورة، لأنه قانونيا ما عندوش الصفة باش يوقّع باسم الشركة.

الوزاني حذّر من أن الوضع يقدر يوصل للفيفا، ووقتها “العواقب غتكون وخيمة على الوداد وعلى العصبة اللي قبلات العقود المخالفة للقانون”، وأضاف أن الفيفا تقدر حتى تطالب باسترجاع الفلوس اللي عطاتها للوداد على المشاركة فمونديال الأندية، وتفرض عقوبات تأديبية.

وزاد كيتكلم على إمكانية تدخل الكاف، اللي كينافس فيها الوداد حاليا، وقال إن الهيئة الإفريقية تقدر تاخذ قرارات صارمة ضد النادي والرئيس إذا توصلات بالعقود والسجل التجاري اللي كيبين أن الناصري ما عندوش أي صفة قانونية.

وختم الوزاني كلامو بسؤال مباشر لايت منا:

“اشنو العلاقة بين شركة الاستثمارات العقارية والسياحية اللي حجزات على السجل التجاري ديال الوداد بمبلغ 1.391.161,89 درهم، بناء على حكم صادر يوم 16 أكتوبر 2025؟ واش ماشي هاد الحجز وقع فولايتك؟”

ووجه الوزاني نداء لأنصار الوداد قائلاً:

“أهل الوداد، فيقو قبل ما يفوت الفوت… شكون اللي فعلا كيدافع على الوداد؟ واش اللي كيفضح الفساد ولا اللي مبدع فيه؟ …