كود سبور//

سالا الوداد الرياضي الاستعدادات ديالو لمواجهة اتحاد طنجة غدا الأربعاء فالتيران الكبير لطنجة، فالماتش اللي مؤجل ما بين الفريقين ضمن الجولة 5 من البطولة الاحترافية لكرة القدم.

وخاض الوداد الرياضي اليوم الثلاثاء، آخر حصة تدريبية فتيران بنجلون فكازا قبل مواجهة إتحاد طنجة، وشرف فيها المدرب الحسين عموتة على وضع آخر اللمسات مع اللعابا قبل الماتش، وشد من بعدها الفريق الأحمر الطريق لطنجة عبر قطار البراق، بتواجد جميع العناصر ديالو باستثناء جلال الداودي اللي موعت.

وغادي يلعب الوداد الرياضي غد الأربعاء ضد إتحاد طنجة، وهي مواجهة مهمة لبطل المغرب وإفريقيا والفوز فيها غادي يخلي الحمرا تبقى فصادرة البطولة وتدخل الديربي الأحد الجاي بمعنويات مرتفعة، مع العلم أن ماتش الوداد وطنجة غادي يتلعب بلا جمهور حيث الجامعة ضربت اتحاد طنجة بالويكلو بسبب الشغب اللي دار جمهورها فالماتش اللي فات ضد الفتح.