كود سبور//

غيسالي الوداد الرياضي الاستعدادت ديال لمواجهة فريق النهضة البركانية، يشد الطريق لبركان باش يلعب الماتش اللي غيكون غدا الاحد فالتيران البلدي د بركان، برسم الدورة 4 من البطولة الاحترافية لكرة القدم.

وغيديرو الوداد الرياضي حصة تدريبية اخيرة اليوم السبت فتيران بنجلون فكازا، ومن تما غيطلعو بالكار إلى مطار محمد الخامس باش يشدو الطيارة من كازا إلى مطار وجدة ومنها للسعيدية باش يلعبو غدا فبركان مع النهضة.

وغيمشي الوداد الرياضي والصفوف ديالو كاملة إلى بركان، حيث جميع العناصر كاينة باستثناء زهير المترجي اللي مازال مبعدو المدرب عادل رمزي على الكروب، وعرفت لاليست عودة عبد حيمود.

ومعولين الوداد الرياضي على الرباح فماتش نهضة بركان غدا الاحد، ويرجعو بنتيجة ايجابية يزكي بها الرصيد ديال والرياح الاخير اللي حقق على السوالم فالدور 3، واخا الماتش ما غيكونش ساهل امام البركانيين اللي متصدرين البطولة بالعلامة الكاملة 3 الرابحات من 3 الماتشات.