گود سبور//

مازال غادي الوداد الرياضي فمسلسل تضييع النقاط وهذا الفريق كايتمحن جوج مواسم هادي بسبب التسيير الكارثي ديال الرئيس هشام ايت منة، ورجع بتعادل تاني وهذه المرة من عند الكوكب المراكشي ضمن الدورة 16 من البطولة الاحترافية، اليوم السبت فتيران مراكش الكبير.

وسالا الماتش بين الكوكب المراكشي والوداد الرياضي بنتيجة التعادل السلبي زيرو لزيرو، وكان المستوى بين الفريقين متوسط بزاف والفراجة دارها غير الجمهور المراكشي والولادي، اما الماتش كان مسدود مع فرص قليلة، مع العلم ان الوداد ماركاو هدف مع نهاية الشوط الاول ولكن الحكم حيدو بعد تدخل الفار بداعي التسلل.

بهذه النتيجة خدا كل فريق نقطة واحدة، وطلعو الوداد الرياضي للصدارة مؤقتا مع الجيش الملكي والمغرب الفاسي برصيد 31 نقطة، اما الكوكب المراكشي محتلين المركز 9 وعندهم 17 نقطة.

وديما مع ماتشات الدورة 16 اللي تلعبو اليوم السبت، فتعادلو حسنية اكادير مع اتحاد طنجة، والسوسيين دابا عندهم 16 نقطة ومحتلين المركز 12، وطنجاوا محتلين المركز 13 وعندهم 14 نقطة.

وتعادلو اتحاد التواركة واولمبيك اسفي بنتيجة واحد لواحد، الرباطيين محتلين دابا المركز 15 برصيد 10 نقاط، واولمبيك اسفي محتلين المركز 14 برصيد 12 نقطة، وقدرو الدفاع الحسني الجديدي يربحو النادي المكناسي فمكناس بنتيجة واحد لزيرو، وولات عند الدكاليين 24 نقطة ومحتلين المركز 7، والكوديم محتلين المركز السادس وعندهم 26 نقطة.