كود سبور//

بداو الوداد الرياضي كيفكرو فالميركاتو الشتوي الجاي، باش يستغلوه لتدعيم صفوف الفريق الأحمر بلاعبين يعطيو الإضافة للمنافسة على البطولة الاحترافية وعصبة أبطال إفريقيا، وأيضا ملزمين يصيفطو اللاعبين اللي ما قدروش يلبيو طموح المدرب عادل رمزي والجماهير.

مصدر مطلع، كشف أن إدارة الوداد الرياضي معولين يدخلو الميركاتو الجاي لانتداب لاعبين مزيانين ويسدو الخصاص اللي كاين فالفريق الأحمر، وهذا الشي بتنسيق مع المدرب عادل رمزي، وبداو فالبحث على لاعبين بقيمة الواك، وكاين مهاجم من الكوت ديفوار مرشح بقوة باش يجي للحمرا.

وبالمقابل فالوداد الرياضي خاصو يصيفط لاعبين ما بقاوش لاقيين بلاصتهم فالفريق وخصوصا الأجانب، ومن الأسماء المرشحة لمغادرة النادي كاين الكونكولي ارسن زولا، والسنغالي جونيور صامبو، وبالإضافة لهاد الجوج كاين حتى زهير المترجي اللي خارج من حسابات المدرب عادل رمزي بصفة نهائية قبل ما يبدا الموسم.