كود سبور//

واصل الوداد الرياضي حصد النتائج السلبية فالبطولة الاحترافية لكرة القدم، وضيع تاني النقاط وهاد المرة مع يوسفية برشيد اليوم الاحد فتيران برشيد، برسم الدورة 24.

وسالا الماتش بين الوداد الرياضي ومول المركز الأخير فالبطولة يوسفية برشيد بنتيجة التعادل السلبي زيرو لزيرو، فماتش كان النيفو ديالو متوسط بزاف، وخا كانو بعض المحاولات من الفريقين.

نتيجة اليوم خداو منها الوداد الرياضي نقطة واحدة رفعو بها رصيدهم إلى 34 نقطة وكيحتلو المركز الخامس، ويوسفية برشيد خداو حتى هما نقطة واحدة رفعو بها رصيدهم إلى 16 نقطة وبقاو فالمركز الأخير.

وعن نفس الدورة ونفس التوقيت، ربحو نهضة بركان فريق الفتح الرياضي بنتيجة 2 لزيرو.

وخداو نهضة بركان 3 بوان رفعو بها رصيدهم من النقاط إلى 37 نقطة وكيحتلو المركز الرابع، على بعد نقطة واحدة من فريق الفتح الرياضي اللي كيحتلو المركز الثالث برصيد 38 نقطة.