كود سبور//

كشفت مصادر مطلعة، أن الوداد الرياضي ما دروش اعتراض على مشاركة لاعب الجيش الملكي معاد بوغيزان مع الفريق البارح الاحد ضد فريق حسنية أكادير برسم الدورة 30 من البطولة الاحترافية، بعدما درس الفريق الأحمر الوضع ديال اللاعب.

ووضحت نفس المصادر، أن اللاعب معاد بوغيزان بالفعل كان عندو طرد مع ليسبوار ديال فريق الجيش الملكي فبطولة الهواة، ولكن من بعد الماتش اللي تطرد فيه، تلعب ماتش ديال ليسبوار ليفار فالهواة ضد فريق أولمبيك وزان، وكان هذا الماتش البارح الاحد قبل من ماتش الفريق الأول ديال ليفار اللي لعبوه ضد حسنية أكادير برسم الدورة 30 من البطولة الاحترافية، وهو الماتش اللي لعب فيه اللاعب وقانونيا راه ما كاين حتى شي مشكل حيث اللاعب يعتبر استنفذ عقوبة التوقيف اللي كانت عليه، حيث ما لعبش مع ليسبوار ديال ليفار فالماتش اللي كان سابق فالتوقيت ماتش الفريق الأول ديال ليفار فالبطولة ضد الحسنية.

وكانو الوداد الرياضي باغيين يديرو اعتراض على ماتش الجيش الملكي وحسنية أكادير، حيث اللاعب المذكور لعب مع ليفار، ولكن ما بقاوش داروها بعدما درسو الملف مزيان، وعرفو أن وضعية اللاعب كانت قانونية وسليمة.