كود سبور//

طالبت ادارة الوداد الرياضي الاتحاد الإفريقي واللجنة المنظمة لمسابقة السوبر ليك الافريقي، بتحمل مسؤوليتهم فحماية الوداديين فتونس من أي خطر ممكن يتعرضو له قبل وخلال وبعد الماتش ضد الترجي فروتور السوبر ليك الأفريقي.

ومصادر مطلعة، كشفت أن ادارة الوداد الرياضي تواصلت مع مسؤولين بالاتحاد الافريقي واللجنة المسؤولة على تنظيم السوبر ليك، باش يخدمو على تأمين الجماهير الودادية اللي من المتوقع تبدا توصل فالساعات المقبلة إلى مطار تونس قرطاج باش تشجع الفريق الآحمر أمام الترجي التونسي غدا الاربعاء.

المسؤولين ديال الوداد الرياضي على وعي بالتهديدات اللي انتشرت على مواقع التواصل الاجتماعي للجماهير الودادية، والمنسوبة لجماهير الترجي واللي وصلت إلى حد التهديد بالتصفية الجسدية وشددو على الكاف بضرورة التحلي باليقظة والتدخل لتأمين الوداديين.

وكتعرف اغلب الماتشات اللي كتلعب فتونس حوادث سوا بسبب جماهير الترجي او غيرها، وراه كان اخرها الاعتداء اللي تعرض له الشاب المغربي عماد مشجع الجيش الملكي فماتش الفريق امام نجم الساحل التونسي فسوسة قبل أسابيع واللي تسبب له فمضاعفات ومات ملي مرجع للمغرب، مع العلم ان جماهير الترجي راه سبق لهم تعداو على الوداديين فماتش فضيحة رادس 2019، من بين الحوادث اللي كانت الاعتداء على حافلة فيها جماهير الواك فالطريق السيار تماك فتونس.