مصطفى الشاذلي – گود سبور//

مازال كايحصد الوداد الرياضي النتائج السلبية، بسبب التسيير الكارثي والعشوائي د الرئيس هشام ايت منة، والفريق ما قدرش يربح ماتش آخر، وهذه المرة خسر مع المغربي الفاسي فتيران فاس الكبير ضمن مؤجل الدورة 12 من البطولة الاحترافية.

وسالا الماتش بين المغربي الفاسي والضيوف ديالهم الوداد الرياضي اليوم الاحد، بنتيجة واحد لزيرو لمصلحة الماص، واللي كان مستواه احسن من الوداد، وقدرو يخطفو هدف الرباح من تسديدة إدريس الجبلي فالدقيقة 80، بعدما ضربت الكورة فراس المدافع الودادي امين بوالفتح وغالطت صاحبو الگول مهدي بنعبيد ودخلت لشبكة الوداد.

الوداد الرياضي غاديا فالخسران مع هشام ايت منة والتسيير ديالو العشوائي، والفريق كاخلص بالمستوى الضعيف اللي كايقدم التسيير الفاشل ديال الرئيس، وضيع نقاط كثيرة فالماتشات اللي مؤجلين واللي كان آخرهم هذا الماتش، وضيع فرصة الانفراد بالصدارة، ودابا محتل المركز الثالث برصيد 30 نقطة، اما المغرب الفاسي خداو 3 نقاط انفرد بها الفريق بالصدارة برصيد 31 نقطة.