الرئيسية > كود سبور > الوداد طواو صفحة شومبيونزليك وبداو يركزو على الماتشات الجايين لتعويض الوداديين
03/03/2024 20:00 كود سبور

الوداد طواو صفحة شومبيونزليك وبداو يركزو على الماتشات الجايين لتعويض الوداديين

الوداد طواو صفحة شومبيونزليك وبداو يركزو على الماتشات الجايين لتعويض الوداديين

كود سبور//

بقاو الوداد الرياضي فمراكش ومن تما غيمشيو الزمامرة باش يلعبو الماتش ديال الفريق ضد نهضة أتليتيك الزمامرة الثلاثاء الجاي، ضمن مؤجل الدورة 20 من البطولة الاحترافية.

وقلبو الوداد الرياضي صفحة الإقصاء بكري من دوري أبطال إفريقيا، بعدما فشل الفريق فتجاوز مرحلة المجموعات من النسخة الحالية، واخا ربح البارح أسيك ميموزا الإيفواري فتيران مراكش الكبير فالجولة الأخيرة، ودابا بداو الواك كيركزو على المستقبل وشنو كيتسنى الفريق هذا الموسم اللي مازال ولاعب فيه على البطولة الاحترافية واخا الحظوظ ديالو قليلة بزاف.

الوداد الرياضي غيديرو حصة تدريبية خفيفة اليوم الاحد تحت إشراف المدرب فوزي البنزرتي باش اللاعبين اللي لعبو ماتش أسيك البارح يحيدو العيا ويزيدو يرتاحو، وغدا الاثنين غيشد الفريق الطريق باش يمشي يلعب الماتش اللي عندو مع الزمامرة فالزمامرة، أما بخصوص الأجواء داخل الوداد فاللاعبين ومكونات النادي متحصرين على الإقصاء بكري من دوري أبطال إفريقيا، ولكن وفنفس الوقت عندهم رغبة باش يعوضو الوداديين بنتائج أحسن فاللي باقي من هذا الموسم اللي مازال لاعبين فيه ماتشات البطولة الاحترافية وكأس العرش.

للإشارة فالوداد الرياضي عندهم 3 المؤجلات، ماتش ضد نهضة الزمامرة عن الدورة 20، وماتش ضد اتحاد طنجة عن الدورة 21، وماتش عن الدورة 22 ضد مولودية وجدة، والفريق محتل دابا المركز الرابع بـ31 نقطة، وبعيد على الصدارة بـ 18 نقطة، وعلى المركز الثاني المؤهل لدوري أبطال إفريقيا بـ14 نقطة.

موضوعات أخرى

22/04/2024 07:00

قاضي التحقيق بابتدائية سطات هبط موظف سجن عين علي مومن الحبس وها التهم للي توجهات ليه