الرئيسية > كود سبور > الوداد شاد فيحيى جبران وما باغيش يطلقو للزمالك المصري
05/08/2022 13:00 كود سبور

الوداد شاد فيحيى جبران وما باغيش يطلقو للزمالك المصري

الوداد شاد فيحيى جبران وما باغيش يطلقو للزمالك المصري

كود سبور//

مازال فريق الوداد الرياضي متشبث بالكابيتان ديالو يحيى جبران باش يبقى الصفوف ديالو، وكيحاول يغريه بعرض زوين باش يضمن البقاء ديالو الموسم لي جاي وما يمشيش لفريق آخر، خصوصا وأن المباريات لي غاب فيها جبران على الفريق الأحمر بانت بلاصتو وآخرها نهائي كأس العرش.

مصادر مطلعة كشفت على أن سعيد الناصيري رئيس الوداد الرياضي كيوجد عرض ليحيى جبران باش يجدد معاه العقد لي انتهى ما بين “ولد السطات” والفريق الأحمر مع نهاية الموسم ديال الكرة لي فات، مشيرة إلى أن الناصيري صعيب عليه يفرط فركيزة من ركائز الوداد بحال جبران، ولي مساعد الرئيس ديال الوداد فمفاوضاتو مع اللاعب ومخلي إدارة الفريق الأحمر متفائلة بالتجديد معاه هي الرغبة ديالو حتى هو باش يبقى فنفس المستوى لي يخليه يمشي مع المنتخب المغربي للمونديال، بحيث أن الانتقال ديالو لفريق آخر ممكن يهدد السفر ديالو مع أسود الأطلس لقطر، فحالة ملعبش كرسمي فالفريق الجديد وهي حاجة تقدر تخليه خارج كأس العالم.

يحيى جبران ومع نهاية العقد ديالو مع الوداد الرياضي، جاتو مجموعة من العروض باش ينتقل لفرق أخرى خارج المغرب، وأهمها العرض لي قدمو فريق الزمالك المصري ولي عندو رغبة كبيرة باش يوقع مع القائد ديال الوداد الرياضي، نظرا للمستوى الكبير ليقدمو مع الوداد ولي خلاه يكون هو الكابيتان الثالث فتاريخ الفريق الأحمر لي كيحمل كأس عصبة أبطال إفريقيا من بعد فخر الدين رجحي وإبراهيم النقاش.

موضوعات أخرى