كود سبور//

رجعو الوداد الرياضي إلى المغرب من جنوب إفريقيا اللي خسرو فيها لقب السوبر ليك الافريقي، بالهزيمة مع ماميلودي صن داونز الجنوب إفريقي، ودابا غيركزو على البطولة الاحترافية ودوري أبطال افريقيا.

ووصلت قبل لخطات من ظهر اليوم الاثنين، طيارة الوداد الرياضي إلى مطار محمد الخامس بالدار البيضاء جاية فرحلة مباشرة من مطار جوهانسبرك فجنوب افريقيا، وحلت بعثة الواك بخير وعلى خير، واخا كاينة اجواء الحزن والصدمة وسطها وعلى اللاعبين بسبب ضياع اللقب الافريقي.

ومن المنتظر يعطي المدرب عادل رمزي عطلة للاعبين الوداد الرياضي باش يرتاحو من عيا السفريات والماتشات اللي لعبو مؤخرا فالسوبر ليك، وبعدها يرجعو يوجدو للماتشات المؤجلين فالبطولة الاحترافية ثم يبداو منافسات دوري أبطال افريقيا.