كود سبور//

حقق الوداد الرياضي والجمهور ديالو رباح مهم أكدو من خلالو أن جميع مكونات النادي يد وحدة، وان استهداف أي فيهم هو استهداف للكيان الأحمر كامل من خلال كورطيج دارو كروب “الوينرز” فشوارع كازا، اللي رجعات حمرا حتى لباب ستاد دونور، وزادو أكدوه بتيفو “ToFo” أو “معا إلى الأبد” وهذا راه فيه رسائل قوية دفاعا عن سعيد الناصيري رئيس الواك اللي ويتعرض لحملة على مواقع التواصل الاجتماعي بنشر الإشاعات عليه، وربط الاسم ديالو ببارون المخدرات “المالي” لدرجة أنه كاين اللي ولا كيربط حتى اسم النادي بهذا الشي، وطبعا الوينرز نزلو للشارع وفطريهم للتيران أكدو أن النادي والمكونات ديالو بعاد على هذا الشي.

فريق الوداد الرياضي حتى هو رجع الجماهير ديالو فرحانين لدويرهم، وربح نهضة الزمامرة، برسم الدورة 5 من البطولة الاحترافية لكرة القدم، وفاز بنتيجة 3 لواحد فستاد دونور، واخا كانوا الزمامرة الاولين اللي ماركاو وزربرو على الواك بهدف مع البداية د الماتش بواسطة زكرياء بحرو فالدقيقة 3، ولكن الوداد جابو التعادل بهدف ديال صامبو جونيور فالدقيقة 22، وقدرو فالشوط الثاني يزيدو الهدف الثاني بواسطة الكابيتان يحيى جبران بضربة رأسية زوينة فالدقيقة 65، والثالث بواسطة الشرقي البحري فالوقت بدل الضائع، وهذا الشي طبعا قدام تشجيعات جماهير الحمرا، اللي اختارت فالشعارات ديالها وهي كتشجع الوداد فماتش اليوم التركزي على الكيان “الوداد الرياضي” وتوحيد الصوت للدفاع على جميع مكوناتو، حيث ولاو كيشوفوه مستهدف بسبب الحملة الفيسبوكية على الرئيس د النادي سعيد الناصيري.

للإشارة فالوداد الرياضي بعد هذا الرباح طلع مؤقتا لصدارة البطولة الاحترافية مع ليفار ونهضة بركان برصيد 10 النقاط، ودابا غيبدا يوجد للمباراة المقبلة ضد اتحاد طنجة السبت الجاي برسم الدور 6 من البطولة الاحترافية، أما نهضة الزمامرة بقات عندهم 4 النقاط وكيحتلو المركز 12.