الرئيسية > كود سبور > الوداد خسرات مع لاسيك وطاحت لاخر ترتيب الكروب 2
02/12/2023 21:45 كود سبور

الوداد خسرات مع لاسيك وطاحت لاخر ترتيب الكروب 2

الوداد خسرات مع لاسيك وطاحت لاخر ترتيب الكروب 2

كود سبور//

باقيين غاديين الوداد الرياضي فالمستوى الكارثي ديالهم، وخسرو الماتش الرابع لهم على التوالي، بهزيمة اليوم السبت مع أسيك ميموزا الايفواري فأبيدجان، برسم الجولة الثانية من دور مجموعات دوري أبطال افريقيا.

الوداد الرياضي خسرو الماتش مع أسيك ميموزا بنتيجة واحد لزيزو فتيران فيليكس بواني بأبيدجان، والهدف ماركاوه لاسيك فالدقيقة 73، بواسطة سانكارا كاراموكو بعدما استغل اخطاء كارثية فدفاع الوداد الرياضي اللي كيتفرج فلاعبين ميموزا وهما باغيين يضربو الكورة للشبكة، مع العلم الفريق الايفواري كان ممكن يخرج رابح بكثر بالنظر للفرص اللي جاوه.

الخسارة الجديدة ديال الوداد الرياضي مع أسيك ميموزا، كتطرح تاني مجموعة من علامات الاستفهام على شنو واقع فالفريق الأحمر، وكتأكد بلي كاين شي خلل داخل المنظومة حيث الكورة ما بقاتش باغيا تدور لا مع المدرب عادل رمزي ولا مع اللاعبين اللي ولاو غير تالفين فالتيران، ولاو جامدين بلاما يصنعو حتى فرص ضد الخصم والأكثر من هذا الشي مخلين كثرة الديشي والوقوف التكتيكي الكارثي فالملعب.

الوداد الرياضي هادي هي الخسارة الثانية له فدور مجموعات دوري أبطال افريقيا، وهي أسوء بداية للفريق فدور كروبات دوري أبطال أفريقيا فالسنوات الأخيرة، والفريق مطالب بمراجعة راسو قبل ما يفوت الفوت، حيث بهاد الأداء الكارثي، غيفرض الواقع على ادارة النادي برئاسة سعيد الناصري التغيير فالفريق سوا يصيفطو المدرب عادل رمزي او يصيفطو لاعبين ويجيبو اخرين فالميركاتو الشتوي الجاي قادرين يهزو توني الوداد.

وكحتل الوداد الرياضي دابا المركز الأخير فالكروب الثاني من دوري ابطال أفريقيا بزيرو نقطة، فواحدة من مفاجآت هذه النسخة، اما اسيك ميموزا كيحتلو الصدارة مع كلاكسي البوتسواني الحصان الأسود فهاد الكروب، برصيد 4 نقاط لكل فريق، وسيمبا التنزاني محتلين المركز الثالث برصيد 2 نقاط، الخصم ديال الواك فالجولة المقبلة هما التنرانيين.

موضوعات أخرى

05/03/2024 07:00

ولد الرشيد: استثمرنا 80 مليون درهم فقطاع الصحة بأقاليم الجهة الأربعة وكسابة الجهة رفعنا من الدعم الموجه ليهم

05/03/2024 06:00

للمرة الثانية.. لجنة اليوروفيجن كترفض الأغنية لي كتقتارحها إسرائيل فالمسابقة العالمية

05/03/2024 05:00

دارت معاها جيست زوين.. المغنية الميريكانية تايلور سويفت حققات حلم مريضة بالكونصير فعمرها 9 سنين

04/03/2024 23:30

أولمبيك آسفي: كنطالبو بفتح تحقيق فماتش الرجاء والحكم الرداد والرخيز اللي كان ف لـ” var” تعداو علينا والغريب أن هاد الحكام دارو 3 الماتشات ديال الفريق الأخضر هاد الموسم وبغينا حقنا