كود سبور//

مازال الوداد الرياضي كيحصد النتائج السلبية فهاد الموسم، وودع الفريق كأس العرش بكري ومن أول ماتش، بعدما خسر مع شباب السوالم اليوم الاحد فتيران البشير ضمن سدس عشر النهائي.

وسالا الماتش بين الوداد الرياضي وفريق شباب السوالم، بنتيجة واحد لزيرو لمصلحة السوالم، بهدف ماركاه لهم كمال القيرع فالشوط الأول وقدرو يحافظو عليه حتى سالا الماتش، واخا الوداد حاولو يرجعو فالمباراة بخلق بزاف ديال الفرص ولكن ما قدروش يماركيو، مع العلم أن السوالم ماركاو 2 أهداف وحيدهم لهم الحكم بداعي التسلل.

وبهذه الخسارة تقصاو الوداد الرياضي بكري من كأس العرش اللي كثر من 22 عام هادي باش ما ربحوش اللقب ديالو، والفريق خرج بكري من المنافسة على گاع الألقاب هذا الموسم بعدما تقصا بكري من دوري أبطال إفريقيا وخرج من لاكورس على بطولة الاحترافية، أما السوالم تكاليفاو لثمن النهائي وغيلعبو الاحد الجاي مع المغرب التطواني فسانية الرمل فتطوان.