كود ـ سبور//

بداو الوداد الرياضي دور مجموعات كأس الكونفدرالية الإفريقية مزيان، وقدرو يربحو فريق نيروبي الكيني اليوم الأحد فـ تيران العربي الزاولي بالدار البيضاء برسم أول جولة.

وسالا الماتش بين الوداد الرياضي ونيروبي الكيني بنتيجة 2-0، وماركا أهداف الفريق الأحمر كل من أيوب بوشتة اللي سجل الهدف الأول فـ الدقيقة 4، وزاد محمد بوشواري الهدف الثاني فـ الدقيقة 44، وتسناو الوداد الدقيقة 85 فين قدر يماركي لهم محمد الرايحي الهدف الثالث.

الوداد الرياضي كانو يقدرو يربحو نيروبي بنتيجة كثر من 3 لزيرو، ولكن التسرع وقلة التركيز حرمهم من تسجيل أهداف أخرى اللي كانت ممكنة بالنظر لعدد الفرص اللي خلقو فـ الماتش، وهذا الشي خاص يخدم عليه مازال المدرب بنهاشم مع الفريق.

وبهذه النتيجة بداو الوداد الرياضي مزيان دور مجموعات كاس الكونفيدرالية الأفريقية، وخداو 3 نقاط مهمة تصدر بها الفريق المجموعة الثانية مع مانييما من الكونگو الديمقراطية برصيد 3 نقاط، قبل ما يسافرو السيمانا الجاية لزنجبار بتنزانيا باش يلعبو مع عزام التنزاني فـ الجولة الثانية.