گود سبور//

بداو الوداد الرياضي كيوجدو للماتش المصيري والحاسم ضد أسيك ميموزا الإيفواري السبت الجاي فمراكش، ضمن الجولة 6 من دور مجموعات دوري أبطال إفريقيا، قبل ما يرجعو من بوتسوانا للمغرب.

واستغلو الوداد الرياضي الوقت اللي عندهم اليوم الاحد فگابورون عاصمة بوتسوانا، بينما يساليو نهضة بركان الماتش ديالهم فجنوب إفريقيا ضمن كأس الكاف، وتوصل الطيارة اللي غيرجعو فيها الفرق بجوج للمغرب وتهزهم من بوتسوانا، ودارو ظهر اليوم حصة تدريبية فلاصال ديال الفندق اللي گالسين فيه، باش يحيدو العيا ديال ماتش البارح ضد گلاكسي، ومن المنتظر تدير البعثة الودادية هاد العشية خرجة فالمدينة باش يبدلو الجو.

وقدرو الوداد الرياضي يربحو البارح گلاكسي البوتسواني ضمن الجولة 5 من دور مجموعات دوري أبطال إفريقيا بهدف واحد لزيرو، ورفعو من خلال هذا الرباح رصيدهم إلى 6 النقاط بالتساوي من سيمبا التنزاني ورا أسيك ميموزا الإيفواري اللي تأهل كمتصدر للگروب 2 برصيد 11 نقطة، وكلاسيك رجعو للمركز الأخير وعندهم 4 النقاط، ودابا الوداد مطالبين يربحو أسيك ميموزا فالجولة 6 ويتسناو گلاكسي يربحو سيمبا فتنازاتيا او على الأقل يتعادلو معهم باش الواك يتأهلو.